Axborot va ommaviy kommunikatsiyalar agentligida Prezident Shavkat Mirziyoyevning 10—11-oktabr kunlari Ashxabodda bo‘lib o‘tgan MDH davlat rahbarlari kengashi yig‘ilishidagi ishtirokiga bag‘ishlangan brifing bo‘lib o‘tdi. Bu haqda agentlik matbuot xizmati ma’lum qildi.
Jurnalistlarning savollariga Prezident huzuridagi Strategik va mintaqalararo tadqiqotlar instituti direktor o‘rinbosari Sanjar Valiyev va institutning boshqa mas’ul xodimlari javob berdi.
OAV vakillarida kelgusi yili O‘zbekiston MDHda raislik qilishi ko‘proq qiziqish uyg‘otdi.
Sanjar Valiyevning ta’kidlashicha, O‘zbekiston tomonidan mazkur jarayonga katta tayyorgarlik ko‘rilgan. Jumladan, MDHda raislik bilan bog‘liq konsepsiya ishlab chiqilgan va Ashxaboddagi sammitda taqdim etilgan. Unda asosiy urg‘u berilishi ko‘zda tutilayotgan va hamkorlarga taklif etilayotgan yo‘nalishlar, kelgusi yili amalga oshirilishi rejalashtirilgan 60 dan ortiq tadbir o‘z aksini topgan.
— MDHdagi raisligimizga Ulug‘ Vatan urushidagi g‘alabaning 75 yilligi sanasi to‘g‘ri keladi. Bunga bag‘ishlab keng ko‘lamli harbiy-memorial tadbirlar o‘tkaziladi, ularga MDH yoshlari faol jalb etiladi. Xavfsizlikni ta’minlash maqsadida huquq-tartibot idoralari, chegara tizimlari hamkorligiga e’tibor qaratiladi. Biz MDH mudofaa vazirlari kengashidagi ishtirokimizni tikladik, havo hujumidan himoya birlashgan tizimiga qo‘shildik. Eng asosiysi, raisligimiz davomida MDHni 2030-yilgacha rivojlantirish konsepsiyasi oxiriga yetkazilishi rejalashtirilgan. Ushbu hujjat ikki yildan beri ishlab chiqilmoqda va strategik ahamiyatga ega, — dedi Sanjar Valiyev.
Tadbirda hamkorlikning muhim yo‘nalishlari sifatida parlamentlararo aloqalarning kuchaytirilishi va mintaqalaro to‘g‘ridan to‘g‘ri aloqalarning o‘rnatilishi qayd etildi. O‘zbekistonda MDH mintaqalari forumi o‘tkazilishi ko‘zda tutilayotgani bildirildi.
Izoh (0)