Доллардаги ҳисоб-китобини камайтириш учун миллий валютадан фойдаланишга қулай шароит яратиб бериш керак. Бу ҳақда Сенатнинг 11 октябрь куни бўлиб ўтган 23-ялпи мажлисида Марказий банк раиси Мамаризо Нурмуротов фикр билдирди, дея хабар бермоқда «Дарё» мухбири Мусулмонбек Иброҳимов.
Ялпи мажлис кун тартибидаги «Валютани тартибга солиш тўғрисидаги» қонуннинг янги таҳрири муҳокамасида сенатор Турғун Искандаров Марказий банк вакилларига шундай савол билан мурожаат қилди: «Ҳеч биримизга сир эмаски, фуқаролар кўчмас мулк ва транспорт воситалари олди-соттисини чет эл валютаси — долларда ҳисоб-китоб қилишга одатланган. Мени қизиқтираётган савол — ушбу қонун маъқулланадиган бўлса, бундай нохуш ҳолатларнинг олди олинадими?».
Мавзуга доир: Марказий банк раиси нима учун Ўзбекистонда нархлар МДҲ давлатларидагидан кўра тезроқ ўсаётганига изоҳ берди
«Буни бевосита ушбу қонун кучга киргандан кейин ‘йўқ бўлади’ дейишимиз нотўғри. Чунки бунга аввал сиёсатимиз билан иқтисодий замин яратишимиз керак. Охирги уч йилгача бўлган даврда қарорларимиз билан мамлакат ичида автомобилни, билетни валютага сотиб олишни ўзимиз белгилаб қўйган эдик. Ваҳоланки, ‘Марказий банк тўғрисидаъги қонунимизда мамлакат ҳудудида ягона тўлов воситаси миллий валюта — сўм деб белгиланган. Шу нуқтаи назардан келиб чиқсак ва, иккинчи томонини ҳам очиқ айтишим керак, биз одамлар миллий валютада ўша олди-сотдиларни бевосита амалга оширишлари учун шароит ҳам яратмаган эдик», — деди Нурмуротов.
Марказий банк раҳбарининг айтишича, битта ҳовлининг миллий валютадаги олди-сотдисидаги пул катта ҳажмда бўлиб кетади. Келажакда бунинг олдини олиш фақат қилинаётган амаллар билан — халқнинг ишончи, энг аввало, миллий валютанинг қадри билан, иккинчидан эса, ўша ҳисоб-китобларни қулай, осон ва енгил ўтишига шароит яратиш билан белгиланади.
«Бунга, бир томондан нақд пулсиз, карточкалар орқали ҳисоб-китобларни кўпайтириш орқали, тўлов карточкаларига одамларни ишончини ошириш орқали эришамиз. Иккинчидан, муомаладаги пул белгиларимиз — банкноталарни номинал структурасини яхшилаш, яъни кенгайтириш йўли эришамиз. Бу ҳолат нафақат Ўзбекистонда, балки бошқа собиқ СССР мамлакатларида ҳам учрайдиган ҳолат. Муаммони фақат ва фақат қилаётган иқтисодий хатти-ҳаракатларимиз билан, аҳолини миллий валютамизга бўлган ишончини шакллантириш ва мустаҳкамлаш билан бартараф этиш мумкин. Менимча, бунга қарши прокуратура ёки бошқа органлар орқали курашсак сал нотўғри бўлади. Энг аввало, биз бунга шароит яратиб берсак, хорижий валютада олди-сотди қилиш ҳолатлари ўз-ўзидан камайиб кетаверади», — дея қўшимча қилди Марказий банк раиси.
Ўз навбатида, Сенат раиси Танзила Норбоева Марказий банк раҳбарининг фикрини маъқуллади: «Буни амалга ошириш учун аҳоли ўртасида тушунтириш ишларини олиб бориш зарур. Тарғибот ишларида сенатор ва депутатларимизни ҳам алоҳида ўрни бўлиши керак бўлади».
Аввалроқ, 12 май куни ОАВда Чилонзордаги икки хонали уйини 25 минг долларга сотган фуқаро ва шу пулга уйни сотиб олган фуқаро Бош прокуратура ҳузуридаги департамент ходимлари томонидан Жиноят кодексининг, жумладан, 177-моддаси бўйича айбланиб, қўлга олингани ҳақида хабар берилган эди. Орадан уч кун ўтиб бу хабарлар Бош прокуратура матбуот хизмати томонидан рад этилган эди. Бу орада эса дастлабки хабардаги вазият жамоатчиликнинг ҳам эътирозига, ҳам кулгисига сабаб бўлган, «Департамент ходимлари ўз уйлари ва машиналарини қайси валютага олган экан?», деган саволлар янграган эди.
Изоҳ (0)