Шу йилнинг 7 октябрь куни Хоразм вилояти Урганч шаҳрига Андижондан Қорақалпоғистоннинг Мўйноқ туманига сафарга отланган Соҳиб Ражабов Хоразм вилоятига етиб келди.
Хоразм вилояти туризмни ривожлантириш департаменти матбуот хизматининг хабар беришича, Соҳиб Ражабов сафарни бошлаганига 100 кундан ошган. У Ўзбекистоннинг қанчалик хавфсиз давлат эканлигини исботлаш ва мамлакатнинг туристик салоҳиятини кўрсатиш мақсадида ўз саёҳатини пиёда юриб амалга оширмоқда.
Хоразм бўйлаб пиёда қилинган сафар давомида Соҳиб Ражабов Урганч шаҳрининг сайёҳлик манзилларига ташриф буюрган. Бундан ташқари, 9 октябрь, чоршанба куни воҳанинг энг қадимий ва эртакнамо шаҳри ҳисобланган Хива шаҳрига етиб борган.
10 октябрь, пайшанба куни Хива шаҳридаги «Ичанқалъа» давлат музей қўриқхонаси ҳудудида Хоразм вилоят ҳокими Фарҳод Эрманов ва Хоразм вилояти ҳокимининг туризм масалалари бўйича ўринбосари Темур Давлетов Соҳиб Ражабов билан учрашди.
Вилоят ҳокими фуқаро Ражабовга Ўзбекистон туризмини тарғиб қилишда қилаётган меҳнатлари учун ўз миннатдорчилигини билдирган.
Қайд этилишича, Соҳиб Ражабов 10—11 октябрь кунлари Хива шаҳрида, 12 октябрь куни «Хива қоракўл» экотуристик объекти, 13 октябрь куни Қўшқўпир тумани ва 14 октябрь куни Гурлан тумани бўйлаб саёҳатини давом эттиради.
Эслатиб ўтамиз, Соҳиб Ражабов 1 июль куни Андижон вилоятининг Хонобод шаҳридан Қорақалпоғистоннинг Мўйноқ туманига (2 200 километр масофа) пиёда йўлга чиққан эди. У 70 кун деганда Бухоро шаҳрига етиб борганди. Сафарини бошлаганидан 3 ой ўтиб, 97 кунда Хоразм вилоятига етиб келди.