Ўзбекистон ва Тожикистон ўртасида парламентлараро ҳамкорлик тўғрисида тарихда илк бор ҳамкорлик битими имзоланди

Ўзбекистон Олий Мажлиси Қонунчилик палатасида Тожикистон парламенти қуйи палатаси вакиллари билан 7-октябр куни учрашув бўлиб ўтди. Бу ҳақда «Дарё» мухбири Мусулмонбек Иброҳимов хабар бермоқда.

Музокаралар якунида Ўзбекистон Олий Мажлиси Қонунчилик палатаси ва Тожикистон парламенти қуйи палатаси ўртасида парламентлараро ҳамкорлик тўғрисида битими имзоланди.

Ўзаро келишувга кўра:

• Тарафлар ўз мамлакатлари қонун ҳужжатларига мувофиқ ҳамкорлик қилади ҳамда ўз ваколатлари доирасида Ўзбекистон ва Тожикистон республикаси ўзаро манфаат касб этувчи турли соҳалардаги муносабатларнинг мустаҳкамланишига кўмаклашади.
• Ўз қўмиталари ва комиссиялари, депутатлик гуруҳлари, девонлари ўртасида доимий алоқалар ўрнатилишига кўмаклашади, қонун ҳужжатларини ишлаб чиқиш ва қабул қилиш амалиётини, парламент фаолияти тажрибасини ўрганиш мақсадида делегациялар билан алмашади.
• Тарафлардан ҳар бирида ўтказиладиган, бошқа Томон учун манфаат касб этувчи масалаларга дахлдор конференциялар, семинарлар, симпозиумларда тарафлар девонлари ходимларининг иштирок этишини таъминлашда бир-бирига кўмаклашади.
• Манфаат касб этувчи халқаро масалалар юзасидан маслаҳатлашувлар ўтказади, халқаро ташкилотлар ва конференциялар доирасида ҳамкорликни амалга оширади ва бир-бирига кўмаклашади.

«Ушбу битим парламентларимиз ўртасида биринчи бор имзоланмоқда. Келишувлармиз икки халқ фаровонлиги учун хизмат қилсин», — деди Ўзбекистон Олий Мажлиси Қонунчилик палатаси спикери Нурдинжон Исмоилов.

Учрашув якунида Тожикистон парламенти вакиллари мамлакатда бўлиб ўтадиган парламент сайловларида халқаро кузатувчи сифатида иштирок этиш учун таклиф этилди.

Тожикистон парламенти делегациясининг Ўзбекистонга ташрифи 8 октябргача давом этади.