Боғча қуриш имконсиз бўлган чекка қишлоқлар, тоғли ва бориш қийин бўлган аҳоли яшаш ҳудудлари учун мўлжалланган мобил ва модулли мактабгача таълим ташкилоти (МТТ)нинг тақдимоти бўлиб ўтди. Бу ҳақда «Дарё» мухбири хабар бермоқда.
Турин политехника университетида ташкил этилган тақдимотда Мактабгача таълим вазирлиги томонидан қайта жиҳозланган 16 та автобус, болалар майдончалари бўлган иккита автотураргоҳ ва 2 та модулли МТТ намойиш этилди.
Isuzu HC 40 русумли автобуслар асосида ҳаракатланадиган МТТ белгиланган йўналиш бўйлаб фаолият юритади. Кўчма гуруҳларда 3 ёшдан 7 ёшгача бўлган 16 нафар бола 3 соат давомида тарбияланади.
Дарсларни тарбияланувчилар учун қизиқарли бўлиши учун вазирлик мутахассислари томонидан турли ёшдаги гуруҳлар мўлжалланган махсус дастур ишлаб чиқилган. Ўқитувчилар эса тегишли тайёргарликдан ўтган.
Ўқув-тарбиявий жараён икки сменада ташкил этилади ва болажонлар енгил овқат билан таъминланади. Машғулотларнинг катта қисми очиқ ҳавода ўтказилиши режалаштирилган. Бунинг учун ҳар бир йўналиш нуқтасида автотураргоҳлар чодир, тўсиқлар, ўриндиқлар, тепаликлар, арғимчоқлар, ўйин уйчалари ва қум майдончаси билан жиҳозланади.
Мактабгача таълим вазири Агриппина Шиннинг таъкидлашича, кўчма ва модулли болалар боғчаларининг ташкил этилиши минтақалардаги МТТ етишмовчилигини камайтиришга хизмат қилади.
«Мактабгача таълим вазирлигининг икки йиллик фаолияти давомида, республика миқёсида 120 та янги давлат МТТ очилди, лекин бу етарли эмас. Агар Тошкентда 80,6 фоиз боғча ёшидаги болани мактабгача таълим билан қамраб олган бўлсак, пойтахт ва йирик шаҳарлардан ташқарида бу кўрсаткичлар анча паст. МТТга бормайдиган болалар 90 фоизни ташкил этадиган ҳудудлар ҳам мавжуд. Қурилиш — узоқ вақт талаб қиладиган ва қимматга тушадиган жараён бўлиб, баъзи жойларда электр ва канализация билан боғлиқ муаммо мавжуд. Мактабгача таълимнинг муқобил шакллари қисқа вақтда жорий этилишидан ташқари, камроқ харажат талаб қилиши билан ҳам ажралиб туради. Узоқ ва чекка ҳудудлардаги кам сонли болалар учун оддий МТТни қуришдан кўра, 7 та модулли ёки 7 ҳаракатланувчан (автобуслар ёрдамида) МТТни жорий этиш ўша ҳудудларда яшовчи болаларни мактабгача таълим билан тезроқ қамрашга кўмак беради», — деди вазир Агриппина Шин.
Мобил МТТ лойиҳаси доирасида «Ўзавтосаноат» мутахассислари автобусларни қайта жиҳозлаб, ҳайдовчиларни ўқитган. Шунингдек, шўба корхоналари негизида болалар майдончалари учун мебел ва аксессуарларни тайёрлаш йўлга қўйилган.
«Ишлаб чиқариш бутунлай маҳаллийлаштирилади, бу эса керак бўлган вақтларда автопаркни тезда кенгайтиришга имкон беради. Бундан ташқари, биз ҳар бир жойда йўналиш ва вақтни назорат қилиб бориш учун автобусларга GPS-трекерларини ўрнатамиз», — деди «Ўзавтосаноат» бошқарув раиси Шавкат Умрзоқов.
Мактабгача таълим вазирлиги мактабгача таълим соҳаси сиёсатини шакллантириш ва юритиш Бош бошқармаси бошлиғи Шаҳноза Мирзиёеванинг маълум қилишича, модулли МТТ ҳар бир тузилма бир-бирига боғланган тўртта денгиз контейнеридан иборат бўлади. Асосий жой болалар мебеллари, ўйинчоқлари ва ўқув материаллари билан жиҳозланган машғулот ва ўйин майдони учун ажратилган. Тўлиқ кунлик гуруҳлар учун енгил бўлган, йиғилувчан каравотлар кўзда тутилган.
«Модулли ва мобил МТТ бугунги кун эҳтиёжларига тезкор ва самарали ечим бўлади. Улар инфратузилмаларга боғлиқ бўлмайди, чунки улар барча зарур нарсалар билан жиҳозланган: ҳожатхона, иссиқ ва совуқ сув таъминоти, тайёр овқатни иситиш учун ошхона, кондиционерлар билан жиҳозланган, автобусларда эса қуёш батареялари ўрнатилган», — деди Шаҳноза Мирзиёева.
Мирзиёева хонимнинг қўшимча қилишича, мобил МТТ лойиҳаси республика бўйича 44 та манзилда амалга оширилади. Улар орқали 2 минг нафар бола қамраб олинади ва бепул бўлади.
Мобил ва модулли МТТни қуриш ҳамда пардозлаш ишларида иссиқ ҳамда оловга чидамли ва соғлиқ учун зарарсиз бўлган материаллар қўлланилади.
Изоҳ (0)