Ўзбекистон Республикаси Инновацион ривожланиш вазирлиги ва Германиянинг таълим ва тадқиқотлар бўйича федератив вазирлиги ҳамкорликда 13 нафар пухта тадқиқот режасига эга ўзбекистонлик ёш олимни Германия тадқиқот институтларида икки ҳафта давомида малака ошириши учун саралаб олди. Бу ҳақда Инновацион ривожланиш вазирлиги матбуот хизмати хабар берди.
Маълум қилинишича, дастурга 86 нафар номзод онлайн ариза топширган. Аризалар Карстен Хайнс бошчилигидаги вазирлик мутасадди ходимларидан ташкил топган комиссия томонидан кўриб чиқилган ва танлов мезонлари асосида баҳоланган.
Иккинчи босқичда суҳбатдан муваффақиятли ўтган ёш олимларга Германия тадқиқот институтларида икки ҳафта давомида малака ошириш учун грант дастури бўйича йўлланма берилган.
Сафар олдидан тадқиқотчиларни Германиянинг Ўзбекистондаги элчиси Гюнтер Лео Оверфелд қабул қилган. Унинг айтишича, Ўзбекистон билан бир қанча лойиҳалар амалга оширилаётган бўлса-да, бундай даражадаги илм-фан соҳасида тажриба алмашиш ишлари илк бор кузатилмоқда.
Тадқиқот робототехника, муқобил энергия, инновацион қурилиш материаллари, зараркунанда ҳашаротларга қарши экологик тоза воситалар билан курашиш каби лойиҳаларни қамраб олган.
«Тадқиқотчилар гуруҳи икки ҳафта мобайнида Германиянинг Берлин, Постдам, Халле, Лейпциг ва Дрезден шаҳарларида жойлашган нуфузли университетлар, тадқиқот марказлари, технологик инкубаторлар, инновацион компаниялар фаолияти билан танишади», — дейилади хабарда.
Бундан ташқари, Инновацион ривожланиш вазирининг хорижий маслаҳатчиси Карстен Хайнс стажировка арафасида иштирокчиларга семинар ташкил этган. Семинар маҳорат дарси шаклида ташкил этилган бўлиб, тадқиқотчилар Германиядаги сафардан қандай билим ва малакаларни олиб келишларига йўлланма вазифасини бажарган.
Изоҳ (0)