O‘zbekiston Respublikasi Innovatsion rivojlanish vazirligi va Germaniyaning ta’lim va tadqiqotlar bo‘yicha federativ vazirligi hamkorlikda 13 nafar puxta tadqiqot rejasiga ega o‘zbekistonlik yosh olimni Germaniya tadqiqot institutlarida ikki hafta davomida malaka oshirishi uchun saralab oldi. Bu haqda Innovatsion rivojlanish vazirligi matbuot xizmati xabar berdi.
Ma’lum qilinishicha, dasturga 86 nafar nomzod onlayn ariza topshirgan. Arizalar Karsten Xayns boshchiligidagi vazirlik mutasaddi xodimlaridan tashkil topgan komissiya tomonidan ko‘rib chiqilgan va tanlov mezonlari asosida baholangan.
Ikkinchi bosqichda suhbatdan muvaffaqiyatli o‘tgan yosh olimlarga Germaniya tadqiqot institutlarida ikki hafta davomida malaka oshirish uchun grant dasturi bo‘yicha yo‘llanma berilgan.
Safar oldidan tadqiqotchilarni Germaniyaning O‘zbekistondagi elchisi Gyunter Leo Overfyeld qabul qilgan. Uning aytishicha, O‘zbekiston bilan bir qancha loyihalar amalga oshirilayotgan bo‘lsa-da, bunday darajadagi ilm-fan sohasida tajriba almashish ishlari ilk bor kuzatilmoqda.
Tadqiqot robototexnika, muqobil energiya, innovatsion qurilish materiallari, zararkunanda hasharotlarga qarshi ekologik toza vositalar bilan kurashish kabi loyihalarni qamrab olgan.
“Tadqiqotchilar guruhi ikki hafta mobaynida Germaniyaning Berlin, Postdam, Xalle, Leypsig va Drezden shaharlarida joylashgan nufuzli universitetlar, tadqiqot markazlari, texnologik inkubatorlar, innovatsion kompaniyalar faoliyati bilan tanishadi”, — deyiladi xabarda.
Bundan tashqari, Innovatsion rivojlanish vazirining xorijiy maslahatchisi Karsten Xayns stajirovka arafasida ishtirokchilarga seminar tashkil etgan. Seminar mahorat darsi shaklida tashkil etilgan bo‘lib, tadqiqotchilar Germaniyadagi safardan qanday bilim va malakalarni olib kelishlariga yo‘llanma vazifasini bajargan.
Izoh (0)