АҚШ Федерал қидирув бюроси Facebook ижтимоий тармоғига Америка махсус хизматларига ёрдам сўраб рус тилида реклама жойлаштирган, деб хабар беради CNN.

Бу каби реклама постларининг жами сони учта. Манбаларнинг сўзларига кўра, рекламалар жорий йилнинг ёзида жойлаштирилган.

Хабарларнинг барчаси иллюстрацияланган. Уларнинг бирида ОТМ битирувчиси ўз онаси билан тасвирланган бўлиб, остига «Ўзингиз ва оилангиз келажаги учун!» деб ёзилган. Иккинчисида эса шахмат доначасининг тасвири остига «Ўз юришингизни қилиш вақти келмадими?» дея қайд этилган. Сўнгги хабар суратида кўприк бўйлаб ҳаракатланаётган эркак ва «Кўприклар қуриш вақти келди» деб ёзилган.

Эълонлар фойдаланувчиларни ФҚБнинг Вашингтондаги минтақавий контрразведка бўлинмасига қарашли сайт дастурига йўналтирган. Дастур саҳифасида бўлинманинг иши тўғрисида маълумот берилган: «ФҚБ жамоатчилик томонидан олинган маълумотлар ёрдамида кўпроқ таҳдидни енгади. Агар сизда ФҚБга унинг вазифасини бажаришда ёрдам берадиган маълумотлар бўлса, илтимос, ушбу манзил бўйича бизнинг офисимизга ташриф буюринг».