2019 йилнинг 1 октябрида ўтган Хавфсизлик кенгаши йиғилишида Туркманистон Республикаси президенти Гурбангули Бердимуҳаммедовнинг фармойиши билан ишдан олинган ички ишлар вазири Искандар Муликов барча давлат мукофотларидан маҳрум қилинди ва генерал-лейтенант унвонидан полиция майори даражасига туширилди.
Йиғилиш давомида Туркманистон бош прокурори Ботир Атдаев ИИВда ўтказилган текширув натижаларини ўқиб эшиттирди ва жуда кўп камчиликлар ҳамда коррупция ҳолатлари кузатилганлигини айтиб ўтди.
Бош прокурорнинг сўзларига кўра, Туркманистон ички ишлар вазирлигида хусусан қуйидаги камчиликлар кузатилган:
• Муликов Аҳал вилоятидаги аҳлоқ тузатиш муассасасига мутахассислиги ветеринар бўлган Бердимурод Бердиевни вақтинчалик раҳбар лавозимига тайинлаган;• Собиқ вазир йўл ҳаракати қоидабузилишларини назорат қила олмаган. Сентябрда йўл ҳаракати хавфсизлиги ойлиги вақтида пойтахт йўлларида транспорт воситаларининг тартибли ҳаракатига халал бериш ҳолатлари кузатилган;• Йўл полицияси капитани Керимгули Чориев хизмат транспортидан ноқонуний фойдаланаётгани фош этилган. У Ашхабод ҳокимлиги коммунал хизмати ходимларини ташишда транспортдан ғайриқонуний равишда фойдаланган;
• Йўл полицияси инспекторлари фаолиятида коррупция ҳолатлари кузатилган. Жумладан, полициячилар Қувонч Муҳаммедов ва Силапберди Ширлиев ўзлари тўхтатган автомобиль ҳайдовчисининг барча ҳужжатлари жойида бўлса ҳам ундан катта миқдорда пора талаб қилган. Инспекторлар ҳайдовчининг машинасини мусодара қилинишини айтиб уни қўрқитган;• Полициячилар ўз ваколатларини суиистеъмол қилган. Ашхабод йўл полицияси офицери Озод Сапаров йўл ҳаракати қоидасини бузган танишларига баённома расмийлаштирилишига тўсқинлик қилишга уринган;• Сентябрда ҳибсга олинган тадбиркор Чори Кулов иши бўйича қўшимча тергов ишлари ўтказилганидан кейин катта миқдорда пора олиш ҳолатлари кузатилганлиги ҳақида янги далиллар пайдо бўлган. Иккита турар жой объекти ва бир нечта автомобиль давлат ҳисобига ўтказилган. Муликов Кулов ишига алоқадорлиги сабабли ишдан олинган бўлиши тахмин қилинмоқда. Тадбиркор 25 йилга қамалганди;• Муликов Чори Куловнинг қариндоши, Ашхабод паспортлаштириш бўлими бошлиғи Дидармурод Муҳаммедовни ишдан бўшатмаган. Муҳаммедов терговда аниқланган маълумотларга кўра, жиноятчи қариндошини яширишга уринган.
Ушбу ишлар юзасидан барча қоидабузарлар ҳибсга олинган, қайд этилган далиллар эса ички ишлар вазири ўз вазифаларини етарли даражада бажара олмаганлигини англатмоқда, дейилади «Туркменистан Сегодня» ахборот агентлиги хабарида.
Туркманистон расмий ОАВ собиқ вазирнинг кейинги тақдири қандай кечиши борасида маълумот бермаган, бироқ норасмий манбалар Муликов қамоққа олиниши мумкинлигини билдирмоқда.
Хабарларга кўра, собиқ вазирнинг шахсий ҳайдовчиси Мақсад Омонов раҳбарининг бизнесини бошқаришда қатнашгани ва ўртада воситачилик қилганлиги учун қамоққа олинган.
Изоҳ (0)