2019-yilning 1-oktabrida o‘tgan Xavfsizlik kengashi yig‘ilishida Turkmaniston Respublikasi prezidenti Gurbanguli Berdimuhammedovning farmoyishi bilan ishdan olingan ichki ishlar vaziri Iskandar Mulikov barcha davlat mukofotlaridan mahrum qilindi va general-leytenant unvonidan politsiya mayori darajasiga tushirildi.
Yig‘ilish davomida Turkmaniston bosh prokurori Botir Atdayev IIVda o‘tkazilgan tekshiruv natijalarini o‘qib eshittirdi va juda ko‘p kamchiliklar hamda korrupsiya holatlari kuzatilganligini aytib o‘tdi.
Bosh prokurorning so‘zlariga ko‘ra, Turkmaniston ichki ishlar vazirligida xususan quyidagi kamchiliklar kuzatilgan:
• Mulikov Ahal viloyatidagi ahloq tuzatish muassasasiga mutaxassisligi veterinar bo‘lgan Berdimurod Berdiyevni vaqtinchalik rahbar lavozimiga tayinlagan;• Sobiq vazir yo‘l harakati qoidabuzilishlarini nazorat qila olmagan. Sentabrda yo‘l harakati xavfsizligi oyligi vaqtida poytaxt yo‘llarida transport vositalarining tartibli harakatiga xalal berish holatlari kuzatilgan;• Yo‘l politsiyasi kapitani Kerimguli Choriyev xizmat transportidan noqonuniy foydalanayotgani fosh etilgan. U Ashxabod hokimligi kommunal xizmati xodimlarini tashishda transportdan g‘ayriqonuniy ravishda foydalangan;
• Yo‘l politsiyasi inspektorlari faoliyatida korrupsiya holatlari kuzatilgan. Jumladan, politsiyachilar Quvonch Muhammedov va Silapberdi Shirliyev o‘zlari to‘xtatgan avtomobil haydovchisining barcha hujjatlari joyida bo‘lsa ham undan katta miqdorda pora talab qilgan. Inspektorlar haydovchining mashinasini musodara qilinishini aytib uni qo‘rqitgan;• Politsiyachilar o‘z vakolatlarini suiiste’mol qilgan. Ashxabod yo‘l politsiyasi ofitseri Ozod Saparov yo‘l harakati qoidasini buzgan tanishlariga bayonnoma rasmiylashtirilishiga to‘sqinlik qilishga uringan;• Sentabrda hibsga olingan tadbirkor Chori Kulov ishi bo‘yicha qo‘shimcha tergov ishlari o‘tkazilganidan keyin katta miqdorda pora olish holatlari kuzatilganligi haqida yangi dalillar paydo bo‘lgan. Ikkita turar joy obyekti va bir nechta avtomobil davlat hisobiga o‘tkazilgan. Mulikov Kulov ishiga aloqadorligi sababli ishdan olingan bo‘lishi taxmin qilinmoqda. Tadbirkor 25 yilga qamalgandi;• Mulikov Chori Kulovning qarindoshi, Ashxabod pasportlashtirish bo‘limi boshlig‘i Didarmurod Muhammedovni ishdan bo‘shatmagan. Muhammedov tergovda aniqlangan ma’lumotlarga ko‘ra, jinoyatchi qarindoshini yashirishga uringan.
Ushbu ishlar yuzasidan barcha qoidabuzarlar hibsga olingan, qayd etilgan dalillar esa ichki ishlar vaziri o‘z vazifalarini yetarli darajada bajara olmaganligini anglatmoqda, deyiladi “Turkmenistan Segodnya” axborot agentligi xabarida.
Turkmaniston rasmiy OAV sobiq vazirning keyingi taqdiri qanday kechishi borasida ma’lumot bermagan, biroq norasmiy manbalar Mulikov qamoqqa olinishi mumkinligini bildirmoqda.
Xabarlarga ko‘ra, sobiq vazirning shaxsiy haydovchisi Maqsad Omonov rahbarining biznesini boshqarishda qatnashgani va o‘rtada vositachilik qilganligi uchun qamoqqa olingan.
Izoh (0)