Россияда Fergana News агентлиги сайти блокланди

Роскомнадзор Fergana News агентлиги сайтини Россия ҳудудида блоклаб қўйди. Ушбу нашр тақиқланган маълумотлар ягона реестрига киритилди.

Қайд этилишича, агентлик асосчиси ва бош директори Даниил Кислов бу хабарни тасдиқлаган. Сайтга кириш 1 октябрь куни чеклаб қўйилган. Fergana News таҳририяти Роскомнадзор бу ҳақда уларни огоҳлантирмагани ва блокланиш сабабини билмаслигини таъкидлаган.

«Блокланиш биз учун кутилмаган ҳолат бўлди, биз бу вазият билан шуғулланамиз. Сайт нима учун огоҳлантиришсиз блокланганига изоҳ талаб қилиб Роскомнадзорга сўровнома юбордик», — дея маълум қилган Fergana News бош муҳаррири Мария Дубнова.

Ҳозирча Fergana News ва Роскомнадзор ўртасида факат битта можаро бор эди ва у ҳали ҳам ҳал қилиш босқичида турганди. Жаҳон суди 2 октябрь куни туркманларнинг «Иегова гувоҳлари» диний ташкилоти Россияда тақиқланганлигини кўрсатмагани учун Fergana News бош муҳарририни жаримага тортиш-тортмаслик масаласини кўриб чиқади.

Fergana News агентлиги 1998 йилда ташкил этилган бўлиб, Ўрта Осиё ҳақида ёзадиган ОАВдир.

Эслатиб ўтамиз, Fergana News Ўзбекистон ҳудудида ҳам 2019 йил май ойига қадар блокланган эди.