Ташқи ишлар вазирлиги Ҳиндистонга бормоқчи бўлган ўзбекистонликларни сув тошқинларидан огоҳлантирди
Ҳиндистоннинг Бихар штати ва бошқа ҳудудларида қаттиқ ёмғирлар ёғиши ва уларнинг натижасида содир бўлган сув тошқинлари ва ўпирилишлар оқибатида минглаб одамлар хавфли ҳудудларни тарк этишга мажбур бўлган. Бу ҳақда Ўзбекистоннинг Ҳиндистондаги элчихонаси берган маълумотга таяниб, Ташқи ишлар вазирлиги хабар берди.
«Мамлакат бўйича жами 110 дан ортиқ одам мазкур табиий офат қурбонига айланган. Одамларни хавфсиз ҳудудларга эвакуация қилиш ҳамда мол-мулкидан айрилган фуқароларга ёрдам кўрсатиш бўйича ҳукумат томонидан тегишли чоралар кўрилмоқда», — дейилади хабарда.
Шу сабабли Ташқи ишлар вазирлиги консуллик-ҳуқуқий департаменти Ҳиндистонда бўлиб турган Ўзбекистон фуқароларини табиий офат ҳудудларига вақтинчалик бормасликка чақиради ва мамлакатнинг Нью-Деҳли шаҳридаги элчихонаси телефон рақамларини эслатади: (9111) 24670774, 24670775, 24105640.
