Ушбу ҳафта ҳуқуқий мавзуларга бой бўлгани бизни ҳайрон қолдирди. Кимлардир озод қилинган, яна кимлардир озодликдан маҳрум қилинган.
Жаноб Куперни кузатдик. ЎФАнинг айтишича, шартнома бекор қилинди. Унинг ўрнини Вадим Абрамов эгаллади.
Купер билан 2018 йилнинг 1 августидан 2021 йилнинг 30 ноябригача, ЖЧ—2022 саралаш цикли учун шартнома тузилганди ва агар терма жамоа ЖЧга йўлланма олса, шартнома турнир охиригача узайтирилиши мумкин эди. Эктор Купер МТЖни бошқарган даврида 17 та ўйиндан еттита ғалаба, тўртта дуранг ва олтита мағлубият кузатилди.
Купер билан имзоланган шартномага кўра, у агар ишдан бўшатиладиган бўлса, 7 миллион евро компенсация олиши кераклиги ҳақида ёзилганди. ЎФА эса фақат 5 миллион беришга рози бўлди. Купернинг йиллик маоши – 2 миллион эвро.
Хўш, Вадим Абрамовга одамлар қандай умид боғламоқда? Айтиш керакки, «Купердан сўнг ким мураббий бўлишини истайсиз?» деган сўровномаларда Абрамов биринчи ўринни олди. @muhrim ёзишича, «йўқ бўлиб кетади, тарқалиб кетади, фақат ютқазади энди» дейилган коллективни туппа-тузук, футбол ўйнашни биладиган жамоага айлантира олган, бироқ оғзи ошга етганда нуқул ер тишлаб қолади, аммо ундан умид катта ва омад тилаш ўринли.
* * *
«Kun.uz» журналистини «ушланг, прокуратурага берворамиз» деб қувлаган, ускунасини синдириб ташлаган «замҳоким» эсингиздами? Унинг бу қилмишини прокуратура «касб этикасига мос» деб хулоса берди ва жиноят иши қўзғатишни рад қилди. Бироқ у «Kun.uz» мухбири Раҳматилло Исроиловни таъмагирликда айблаб видеоинтервью ҳам берган, мухбир эса уни ноҳақ айблагани учун Бош прокурорга мурожаат йўллаганди. Бироқ хулоса берганлар бунга тўхталмаган. «Kun.uz» очиқ қолган саволларни ёритиш хусусида баёнот берди.
Бу ҳафтада «замҳоким» Абдурасул Ваҳобов ишдан кетди. Тошкент шаҳар ҳокими Жаҳонгир Ортиқхўжаев бунга муносабат билдириб, унинг оила аъзоларини «интернетда бўлаётган бўҳтон гаплар ва салбий изоҳларга эътибор қилмасликка» чақирди.
Бироқ Абдурасул Ваҳобовнинг қилмиши юзасидан баҳслар тингани йўқ. Таниқли блогер Хушнудбек Худойбердиев замҳоким «катта пора берилиши ҳақидаги таклифни яшириб», барибир қонунни бузганини таъкидлади ва мутасадди орган хулосасини кулгили деб атади. АОКА бош директори Комил Алламжонов «Ахборот ва оммавий коммуникациялар агентлиги ҳар бир журналист ва блогерни унинг ҳуқуқлари бузилишидан ҳимоя қилишни давом эттиради» деб ёзди. Давлат бошқаруви академияси декани, фан доктори Отабек Ҳасанов «Агар жамиятда яна шундай ҳоким ўринбосари чиқса, бизга қийин бўлади. Демак, бошқа чиқмаслиги (чиқиши мумкин бошқа муаммолар билан), худди шу муаммо қайтарилмаслиги учун бу каби ҳолатларга тезда ечим беришимиз даркор», деди.
* * *
Солиқ сиёсатини янада такомиллаштириш сари навбатдаги қадам босилди. Ўзбекистонда қўшимча қиймат солиғи ставкаси 5 фоизга пасайтирилади, фойда солиғи ставкаси эса 3 фоизга оширилади. Айтилишича, Ўзбекистон 2008 йилги глобал инқироздан сўнг ҚҚС ставкасини сезиларли пасайтираётган жаҳондаги илк мамлакат бўлмоқда. Бизнесмен Зафар Ҳошимовнинг фикрича, ставканинг пасайтирилиши «яширин иқтисодиёт секторининг қисқаришига ва бюджет йиғимларининг сезиларли ошишига олиб келади». Иқтисодчи Қаҳрамон Аслановнинг фикрича эса «Солиқ ставкаларидаги ўзгаришлар тадбиркорларга енгиллик бериш йўлидаги ижобий қадам, аммо бу ислоҳотлар коррупция, монополия ва яширин иқтисодиётга қарши кураш билан боғлиқ ҳолда, аҳоли манфаатларини энг юқорига қўйиш принциплари асосида амалга оширилмаса, ягона таъсири бюджет камомадида намоён бўлади, холос».
* * *
26 сентябрь куни ўзбекистонлик ёш олим, туркология мутахассиси, 2017 йили давлатга хиёнатда айбланиб ҳибсга олинган Андрей Кубатиннинг иши Тошкент вилояти судида кўриб чиқилди. Кубатин тўлиқ оқланди ва суд залидан озод этилди.
Кубатин Туркия фуқаросига давлат сири акс этган ҳужжатларни бериб юборишда айбланган, аммо бу айблов судда исботланмади. Ўзбекистонлик ва хорижлик олимлар, ҳуқуқшунослар, Кубатиннинг яқинлари ва ҳамкасблари айтган кўплаб эътирозлар, турли инстанцияларга йўлланган мурожаатлардан сўнг иш қайта кўриб чиқилиб, у озод қилинди. Ўзбекистон Омбудсмани Андрей Кубатин иши бўйича баёнот бериб суд қарорини олқишлади.
* * *
Ўзбекистонда чуқур илдиз отган ишсизлик манзарасида фуқаролар чет элларга иш қидириб турли «марат»ларнинг қўлига тушиб ҳаққини ундиролмай қолган ҳолатлар ўнлаб йиллар давомида юзлаб марта кузатилган. Сўнгги йилларда давлат четга ишга юборувчи агентликлар фаолиятини ривожлантириб фуқароларга енгиллик яратишни мақсад қилди. Бироқ энди «маратчасига» ишларни ушбу агентликлар қилаётган ҳолатлар кузатилмоқда. Хусусан, ўтган ҳафтада Тошкентда 52 кишининг аризаси асосида Human хусусий бандлик агентлиги раҳбарига нисбатан жиноят иши қўзғатилди.
Ўзи нима бўлган? Аризачилар Бандлик ва меҳнат муносабатлари вазирлиги томонидан 2018 йил ноябрь ойида тақдим этилган тегишли лицензияга эга бўлган Human бандлик агентлиги МЧЖ билан 2018 йилнинг ноябрь ойидан 2019 йилнинг сентябрь ойигача шартномалар тузган. Human уларни Европа давлатларида, хусусан, Германия, Чехия, Япония, Туркия, Болгария ва Литвада ишга жойлаштириш мажбуриятини ўз зиммасига олган. Бунинг учун ҳар бир аризачи МЧЖнинг ҳисоб рақамига 18 дан 35 миллион сўмгача бўлган миқдордаги маблағни кўчирган. Шу тарзда Human бандлик агентлиги МЧЖнинг ҳисоб рақамига 52 нафар аризачидан умумий миқдорда 1 670 500 000 сўм келиб тушган. Бироқ уларнинг ҳеч бири чет элда ишга жойлаштирилмаган.
* * *
27 сентябрь куни ДХХнинг собиқ раиси Ихтиёр Абдуллаев 18 йилга озодликдан маҳрум этилди.
Ихтиёр Абдуллаев 2019 йил февралида Давлат хавфсизлик хизмати раиси лавозимидан озод этилган, бунга расман унинг соғлиғи ёмонлашгани, сўнгги бир йил давомида икки марта оғир операцияни бошдан ўтказгани сабаб қилиб кўрсатилган эди. Кейинроқ, 2019 йил май ойида Абдуллаевнинг «порахўрлик ботқоғи»га ботгани ҳақида мақолалар пайдо бўлди, июнда эса Бош прокуратура Ихтиёр Абдуллаевга нисбатан жиноят иши очилганини тасдиқлаганди.
Суд ҳукми билан унинг ўринбосар ва маслаҳатчилари ҳам 5 йилдан 16 йилгача озодликдан маҳрум қилинди.
Ушбу иш Президент давлат хавфсизлик хизмати раиси ўринбосари Отабек Умаровга топширилгани айтилган.
* * *
25 ёшли ўзбек миллиардери деб тавсифланган, инновацион бизнес лойиҳалар соҳиби, Ўзбекистон Либерал партияси фаол аъзоси Иброҳим Исроилов қамоққа олинди. У Straus House компаниясини ташкил этиб, туяқушчиликни ривожлантираётган, Ўзбекистонда туяқушчилик сердаромад соҳа эканини тадбиркорларга уқтираётган эди.
«Страусхаус»чилар Андижон, Фарғона, Наманган, Бухоро ва Қашқадарё вилоятларида яшовчи жисмоний ва юридик шахслар билан 2019 йилнинг январь апрель ойлари давомида 90 кун муддат ичида Жанубий Африка Республикасидан Ostrich зотли туяқуш жўжасини етказиб бериш юзасидан шартномалар расмийлаштириш орқали уларнинг ишончига кириб, республиканинг турли вилоятларида яшовчи 300 дан ортиқ фуқаронинг жуда кўп миқдордаги пул маблағини фирибгарлик йўли билан талон-торож этишда гумон қилинмоқда.
Ҳозир тергов ишлари кетяпти.
«Дарё» янгиликларини кузатиб боринг. Ўзбекистон ва дунё хабарларидан энг биринчи хабардор бўлинг.
Изоҳ (0)