Афғонистонда президент сайловлари кунида уюштирилган ҳужумларда 32 нафар одам ҳалок бўлди

Афғонистонда бўлиб ўтган сайловлар вақтидаги 113 та ҳужум оқибатида қурбон бўлганларнинг сони 32 нафарга, жароҳатланганлар эса 123 нафарга етган. Бу ҳақда Pajhwok’га асосланиб «Коммерсантъ» хабар берди.

Маълумотларга кўра, террорчилик ҳаракатларининг 64 таси учун масъулиятни «Толибон» ҳаракати вакиллари ўз зиммасига олган. Аввалроқ, яраланганлар сони 15 тага етгани ҳақида хабар қилинганди.

«Толибон» ҳаракати Афғонистонда давлат президентлиги учун сайловлар ўтказишга қаршилик қилишини маълум қилганди. Ҳаракат жангарилари мамлакат аҳолисини сайловолди тадбирлар ва президент сайловлари кунида ушбу ҳужумларга тайёр туришга чақирганди.

Мамлакатда президентлик сайловлари икки марта кечиктирилган, ҳатто ўтказилмаслик хавфи остида ҳам қолганди. Бунга АҚШ ҳамда «Толибон» ўртасида тузилаётган келишув сабаб бўлганди. Аммо Вашингтон келишув жараёнини тўхтатгач, Афғонистон ҳукумати қалтис вазиятга қарамасдан сайловларни ўтказишга қарор қилганди.