Afg‘onistonda prezident saylovlari kunida uyushtirilgan hujumlarda 32 nafar odam halok bo‘ldi

Afg‘onistonda bo‘lib o‘tgan saylovlar vaqtidagi 113 ta hujum oqibatida qurbon bo‘lganlarning soni 32 nafarga, jarohatlanganlar esa 123 nafarga yetgan. Bu haqda Pajhwok’ga asoslanib “Kommersant” xabar berdi.

Ma’lumotlarga ko‘ra, terrorchilik harakatlarining 64 tasi uchun mas’uliyatni “Tolibon” harakati vakillari o‘z zimmasiga olgan. Avvalroq, yaralanganlar soni 15 taga yetgani haqida xabar qilingandi.

“Tolibon” harakati Afg‘onistonda davlat prezidentligi uchun saylovlar o‘tkazishga qarshilik qilishini ma’lum qilgandi. Harakat jangarilari mamlakat aholisini saylovoldi tadbirlar va prezident saylovlari kunida ushbu hujumlarga tayyor turishga chaqirgandi.

Mamlakatda prezidentlik saylovlari ikki marta kechiktirilgan, hatto o‘tkazilmaslik xavfi ostida ham qolgandi. Bunga AQSh hamda “Tolibon” o‘rtasida tuzilayotgan kelishuv sabab bo‘lgandi. Ammo Vashington kelishuv jarayonini to‘xtatgach, Afg‘oniston hukumati qaltis vaziyatga qaramasdan saylovlarni o‘tkazishga qaror qilgandi.