Андижон вилояти Қорасув шаҳрида жойлашган «Мустақилликнинг 15 йиллиги» маҳалласида ноёб «Қўштепа-2» археологик ёдгорлиги мавжуд. Аҳоли ва мутасаддиларнинг эътиборсизлиги билан шундай маданий мерос объекти йўқолиб кетиш хавфи остида турибди, дея хабар беради «Xabar.uz».
2014 йилдан бери шу ёдгорликда Археологик тадқиқотлар институти томонидан олиб борилган тадқиқотлар натижасида «Қўштепа-2» ҳудудида милоддан аввалги I минг йиллик ўрталаридан милоднинг VIII асрларигача узлуксиз ва XI—XII асрларда қисман аҳоли яшаб, ўзларидан ўша даврлар тарихига оид меъморий ва ҳунармандчилик буюмлари кўринишида улкан маданий мерос қолдирган.
«Ёдгорликнинг турли қатламларидан қадимий зироаткорлар (Чуст маданияти – милоддан аввалги XII—VII асрлар)га оид сопол идиш қолдиқлари ҳамда ибтидоий одамлар (сўнгги палеолит – бундан 40-30 минг йил аввал)га оид тош қуроллар топилган. Бу ҳолат давлатимизнинг ҳозирги сиёсатига монанд археологик туризмни ривожлантириш учун ўта муҳимдир», — дейилади хабарда.
Археологик тадқиқотлар институти ходимлари «Қўштепа-2» ёдгорлигини нафақат Ўзбекистон, балки чет эл қадимги тарих мухлисларига тарғиб қилиш борасида имкон қадар иш олиб бормоқда. Натижада охирги 5 йил ичида 20 дан ортиқ турли (ўзбек, рус, инглиз, хитой) тилларда мақолалар ҳамда ўзбек ва рус тилларида телевидениеда интервью берилган.
Шу билан бирга, Андижон давлат музейида «Кўҳна замин дурдоналари» рукни остида Қўштепа археологик кўргазмаси ташкил қилиниб, у водий вилоятлари музейларига ҳам олиб чиқилмоқда. Навбатдаги режада «Қўштепа-2» ёдгорлигини «осмон остидаги музей» кўринишига олиб келишдир.
Бироқ ёдгорлик ҳудуди одамларга уй-жой учун чек қилиб берилиши шундай нодир тарих захирасининг йил сайин бузилишига олиб келмоқда. Бу йил ёдгорликнинг кўшк қисми шимолидаги илк ўрта асрларга оид мудофаа девори — 20х2 метр жойи экскаваторда кавлаб олинган, кўшкнинг жануби эса 4 метр энликда бузилиб ғишт қилиб сотилган.
Изоҳ (0)