Жорий йилнинг сўнгги саккиз ойи давомида вояга етмаганлар ўртасида жиноятлар сони 34,78 фоизга камайди. Бу ҳақда Тошкент шаҳар ИИББ матбуот хизматига таяниб, «NUZ.uz» хабар берди.
ИИББ томонидан ўтказилган брифингда вояга етмаганлар томонидан амалга оширилган жиноятлар ҳақида маълумот берилди. Унда айтилишича, мактаб, коллеж ҳамда бошқа умумтаълим муассасалари ўқувчиларининг ёнидан пичоқ, кастет ва бошқа хавфли предметлар топилган.
Расмий статистикага кўра, ўқувчилар томонидан мактабга олиб келинадиган совуқ қурол — бу пичоқ. Йил бошидан буён ўн нафар пойтахт ўқувчиларининг ёнидан пичоқ топилган: Миробод ва Учтепа туманларидаги мактабларда иккитадан, Мирзо Улуғбек, Юнусобод, Шайхонтоҳур, Яшнобод, Чилонзор ва Олмазор туманларида биттадан. Шунингдек, Мирзо Улуғбек туманидаги ўқувчининг сумкасидан кастет, Чилонзордаги ўқувчиникидан бита (бейсбол таёғи) топилган.
Тошкентдаги шаҳар милиция бўлимларининг ҳар бирида вояга етмаганлар масалалари билан шуғулланувчи бир нафар инспектор бор. Улар ҳар куни мактабларга бориб, ўқувчилар давомати, шунингдек, металлодетектор ёрдамида текширувларни амалга оширади. Асосан, 10—11-синф ўқувчилари назорат остига тушади.Агар ‘қурол’ топилгудек бўлса, инспектор уни олиб қўйиб, гувоҳлар иштирокида далолатнома тузади ва ўқувчининг ота-онасини суҳбатга чақиради. Шундан сўнг тўпланган барча материаллар ҳокимият қошидаги комиссияга юборилади. У ерда эса Маъмурий жавобгарлик кодексининг 47-моддасига асосан иш очилиб, жарима белгиланади.
Абдурашид Очилов, ИИББ вояга етмаганлар иши бўйича бош инспектор
Изоҳ (0)