Тошкентдан Қозоғистоннинг Хоргос ва Петропавлск шаҳарларига 25 сентябрдан мунтазам автобус қатновлари йўлга қўйилади. Бу ҳақда «Дарё»га Транспорт вазирлиги матбуот хизмати маълум қилди.
Қайд қилинишича, мазкур йўналишларда Uzautotrans Service корхонасининг Yutong автобусларида хизмат кўрсатилади.
«Тошкент—Хоргос» қатновлар ҳафтанинг душанба ва пайшанба кунлари амалга оширилади. Автобуслар «Тошкент» автовокзалидан соат 10:00 да йўлга чиқади. Чипта нархи эса 200 000 сўм этиб белгиланган. Йўналиш масофаси 1235 километрни ташкил этади.
«Тошкент—Петропавлск» йўналишида қатновлар кунора амалга оширилади. Автобус «Тошкент» автовокзалидан соат 19:00 да жўнаб кетади. Чипта нархи 337 000 сўмни ташкил этади. Йўналиш масофаси 2150 километр.
Аввалроқ Uzautotrans Service корхонаси 24 сентябрдан «Тошкент—Қозон», «Тошкент—Нур-Султон» ва «Тошкент—Хўжанд» йўналишларида ҳам мунтазам қатновларни амалга ошириши ҳақида хабар берилганди.
«Тошкент—Қозон» йўналиши бўйича қатновлар ҳафтанинг сешанба ва жума кунлари амалга оширилади. Автобус соат 11:00 да «Тошкент» автовокзалидан жўнаб кетади. «Тошкент—Қозон» халқаро автобус йўналишининг масофаси 2651 километр бўлиб, йўлкира ҳақи 500 000 сўмни ташкил этади. Сафар давомида автобуслар Ўзбекистоннинг «Ғишткўприк», Қозоғистон республикасининг ‘Жибек Жўли’ ва ‘Жайсан’ ҳамда Россиянинг ‘Сагарчин’ чегара божхона постларидан ўтади.
Шунингдек, «Тошкент—Нур-Султон» йўналишида қатновлар кунора амалга оширилади. 1646 километр тенг масофани автобуслар 27 соат 30 дақиқада босиб ўтади. Ушбу йўналишда чипта нархи 220 000 сўмни ташкил этади.
Бундан ташқари, «Тошкент—Хўжанд» йўналишида қатновлар ҳар куни амалга оширилади. Автобуслар «Тошкент» ва «Хўжанд» автовокзаллари ўртасида Нурафшон, Бўка шаҳарлари орқали ҳаракатланиб, «Ойбек» ва «Фотеҳобод» назорат ўтказиш пунктларидан ўтади. Ушбу йўналиш масофаси 174 километрга тенг бўлиб, чипта нархи 50 000 сўмни ташкил этади.
Барча йўналишлар бўйича чипталарни «Тошкент» автовокзали кассаларидан харид қилиш мумкин.
Изоҳ (0)