Миср ҳукумат оммавий намойишларни тақиқлагани, намойиш иштирокчиларига қамоқ таҳдид солиб турганига қарамай, юз мисрликлар мамлакат президенти Абдулфаттоҳ ас-Сисийга қарши норозилик акцияларида қатнашди, дея хабар бермоқда Meduza.
The Guardian’нинг хабар беришича, намойишлар пойтахт Қоҳирада, шунингдек, Искандария, Сувайш ва ал-Маҳалла-ал-Кубра шаҳрида ҳам бўлиб ўтган. Бу каби оммавий норозилик намойишлари Мисрда сўнгги йилларда деярли бўлмаётган эди.
Намойишчилар президент ас-Сисийнинг истеъфосини талаб қилиб, унинг портретларини йиртиб ташлаган. Қоҳирада полицияда кўздан ёш оқизувчи газдан фойдаланган, бироқ кўплаб намойишчилар, аввало ёшлар, шундан кейин ҳам кўчада чиқиш қилган. 55 киши ҳибсга олинган.
Аввалроқ 43 ёшли актёр ва бизнесмен Муҳаммад Али аҳолини ҳокимият органларидаги коррупцияга норозилик билдириш учун кўчаларга чиқишга чақирган эди (унинг ўзи ҳозирда Испанияда яшайди). Унинг мурожаати YouTube’да эълон қилинган ва ижтимоий тармоқлар орқали тарқалган эди.
Генерал Абдулфаттоҳ ас-Сисий 2013 йилги ҳарбий тўнтариш натижасида Мисрдаги ҳокимият тепасига келган. У 2014 йили, расмий маълумотларга кўра, сайловчиларнинг 97 фоиз овозини қўлга киритиб, президент лавозимига сайланган. 2018 йили яна худди шундай натижа билан президентликка қайта сайланган — ас-Сисийнинг сайловдаги рақиби унинг ўзини очиқдан-очиқ қўллаб-қувватлаган эди.
Изоҳ (0)