Ўзбекистонда ҳар йили битта туманга 100 та ноқонуний никоҳ тўғри келмоқда. Бу рақамни келтирган сенатор Энахон Сиддиқованинг фикрича, баъзида ким томонидан ўқилгани ҳам номаълум бўлган айрим шаърий никоҳлар ажримлар сони ошишига таъсир қилмоқда.
«Ноқонуний шаърий никоҳ учун айрим қўшни давлатларимизда ҳатто жиноий жавобгарлик ҳам белгиланган», деди Сиддиқова тўйлар, оилавий тантаналар, маърака ва маросимлар ўтказилишини мувофиқлаштириш бўйича Республика комиссиясининг биринчи мажлисида.
Сенаторнинг бу сўзларига адлия вазири ўринбосари Худоёр Мелиев муносабат билдирди, дея хабар бермоқда «Kun.uz».
Шаърий никоҳ масаласида битта нарсани тўғри тушуниш керакки, ислом динида никоҳни албатта имом ўқиши шарт, деган нарса йўқ. Шунинг учун биз бу борада қонун бўйича ҳам қанақадир жавобгарлик белгиламаганмиз.Ўзбекистонда қонуний никоҳдан ўтмаган фуқароларга шаърий никоҳ ўқиган шахслар Маъмурий жавобгарлик тўғрисидаги кодекснинг 201-моддаси 2-қисми (диний йиғилишлар, кўча юришлари ва бошқа диний маросимлар ўтказиш қоидаларини бузиш), 241-моддаси (диний таълимотдан сабоқ бериш тартибини бузиш) ва 47 (3)-моддаси 3-қисми (никоҳ ёшига етмаган шахс билан никоҳ тузишга доир диний маросимни амалга ошириш) асосида жаримага тортиб келинади.Етарли диний билимга эга шахс никоҳ ўқиши мумкинлигини ҳисобга олсак, уларга жавобгарлик белгилаш унчалик тўғри эмас.
Худоёр Мелиев, Ўзбекистон адлия вазири ўринбосари
Шунингдек, «Тўй-ҳашамлар, оилавий тантаналар, маърака ва маросимлар, марҳумларнинг хотирасига бағишланган тадбирлар ўтказилишини тартибга солиш тизимини янада такомиллаштириш тўғрисида»ги қарорга асосан, оилавий тадбирларда диний мавзуда маъруза кўзда тутилган бўлса, ушбу маъруза дин идорасининг ваколатли вакили томонидан ўқилиши шарт этиб белгиланган.
Изоҳ (0)