Ўзбекистонга 2019 йилда товарлар импорти ўтган йилнинг мос даврига таққослаганда 800 миллион долларга ошган. Бу ҳақда 18 сентябрь куни Иқтисодиёт ва саноат вазири ўринбосари Ўктамжон Каримов саноатни маҳаллийлаштириш масалаларига бағишланган журналистлар билан очиқ мулоқотда айтиб ўтди, дея хабар бермоқда «Дарё» мухбири Мусулмонбек Иброҳимов.
Ўктамжон Каримовнинг таъкидлашича, кейинги 20 йил маҳаллийлаштириш билан шуғулланяпмиз деб келинган, лекин рақамлар буни аксини кўрсатмоқда. Бунда энг катта камчилик — Ўзбекистонда ишлаб чиқарувчилар билан маҳсулотга эҳтиёжи борлар ўртасида узвий, чамбарчас боғлиқлик тизими йўқ.
«Бор, лекин ҳаммани бир вақтда қамраб олиш тизими яратилмаган эди. Ишлаб чиқарувчини кимдир билади, кимдир эса йўқ. Афсуски, бошқа салбий ҳолатлар ҳам бор. Масалан, йирик корхоналар, айниқса, давлат улуши борлари маҳаллий ишлаб чиқарувчидан маҳсулот сотиб олишда қандайдир бошқа мезонларни ҳисобга олибми ёки ўзининг дунёқараши ҳисобигами ишлагиси келмаяпти десак, бу ҳам аччиқ ҳақиқат. Мана шу муаммони ҳал қилшни бирдан-бир йўли — сотувчи билан харидор ўртасида шаффофликни таъминлаш. Бунинг учун Иқтисодиёт ва саноат вазирлиги қошида электрон портал амалиётга жорий этилмоқда», — деди Ўктамжон Каримов.
Вазир ўринбосари маълум қилишича, порталда дастлабки босқичда давлат улуши бор барча корхоналарнинг реестри жой олади.
«Корхоналар нима ишлаб чиқаряпти, нимага талаб бор, нима импорт қилиняпти, нима экспорт қилаётгани каби барча маълумотлар жойлаштирилади. Бунинг натижасида республикага қайси товарлар импорт бўлаётгани ойдинлашади. Бундан ташқари, порталда маҳаллий ишлаб чиқарувчиларнинг ҳам каталоги жойлаштирилади. Яъни уларнинг манзили, нима ишлаб чиқарилаётгани ва ишлаб чиқараётган маҳсулотининг бир нечта расми ҳам ўрин олади. Маҳсулотларни порталга жойлаштириш билан ҳар бир туманда ишчи гуруҳ шуғулланади. Электрон портални юритиш учун Иқтисодиёт ва саноат вазирлиги қошида давлат унитар корхонаси ташкил этилади. Олди-сотди жараёнида юзага келадиган ўзаро келишмовчиликлар арбитраж орқали ҳал этилади», — деди Каримов.
Маълумот учун, порталда савдо қилиш шартномаси учун одатдагидан уч баробар камроқ ҳақ тўлаш кўзда тутилган. Онлайн савдолар 24/7 соат давомида барча учун очиқ бўлади. Ҳар бир сотувчи ва харидор ўзи ҳақида камида 10 та манзил кўрсатади (телефон рақами, электрон манзили ва бошқалар). Кўрсатилган манзилга савдо амалиётлари ҳақида автоматик ахборот юборилади. Порталнинг домен номи тасдиқланган, ҳозирги кунда тест режимида ишламоқда.
Изоҳ (0)