Фарғона вилоятининг Тошлоқ туманидаги Қумариқ маҳалласи аҳолиси қишлоқни кесиб ўтган Катта Фарғона каналининг нариги томонига ўтишда қийинчиликларга дуч келаётганди. Бу ҳақда «Халқ сўзи» хабар берди.
Аллақачон ўз умрини ўтаб бўлган кўприкнинг қурилганига 38 йил бўлган. Фуқаролар канал ёқалаб ҳар куни 5 километр масофани босиб ўтишга мажбур эди. Чунки тахта кўприкдан мактабга қатновчи болалар орасида канал билан боғлиқ бахтсиз ҳодисаларнинг тез-тез бўлиб туриши одатий ҳолга айланиб қолганди.
Шу қишлоқда истиқомат қилувчи Эргашали Шокиров бир неча ўн йилдан буён Ҳаж сафари учун маблағ жамғариб юрган эди. Маҳалладаги кўприк муаммосига кўз юма олмаган Эргашали ота шу маблағини замонавий ва мустаҳкам кўприк қуриш учун сарф қилди. Натижада Катта Фарғона канали устида яна бир ихчам ва мустаҳкам кўприк бунёд бўлди.
Каналнинг нариги томонидаги янги маҳаллаларда 40 дан ортиқ хонадон бор. Эндиликда бу хўжаликлардаги 100 дан ортиқ ўқувчи хавфсиз кўприк орқали мактабга қатнайдиган бўлди.
Изоҳ (0)