O‘zbekistonga 2019-yilda tovarlar importi o‘tgan yilning mos davriga taqqoslaganda 800 million dollarga oshgan. Bu haqda 18-sentabr kuni Iqtisodiyot va sanoat vaziri o‘rinbosari O‘ktamjon Karimov sanoatni mahalliylashtirish masalalariga bag‘ishlangan jurnalistlar bilan ochiq muloqotda aytib o‘tdi, deya xabar bermoqda “Daryo” muxbiri Musulmonbek Ibrohimov.
O‘ktamjon Karimovning ta’kidlashicha, keyingi 20 yil mahalliylashtirish bilan shug‘ullanyapmiz deb kelingan, lekin raqamlar buni aksini ko‘rsatmoqda. Bunda eng katta kamchilik — O‘zbekistonda ishlab chiqaruvchilar bilan mahsulotga ehtiyoji borlar o‘rtasida uzviy, chambarchas bog‘liqlik tizimi yo‘q.
“Bor, lekin hammani bir vaqtda qamrab olish tizimi yaratilmagan edi. Ishlab chiqaruvchini kimdir biladi, kimdir esa yo‘q. Afsuski, boshqa salbiy holatlar ham bor. Masalan, yirik korxonalar, ayniqsa, davlat ulushi borlari mahalliy ishlab chiqaruvchidan mahsulot sotib olishda qandaydir boshqa mezonlarni hisobga olibmi yoki o‘zining dunyoqarashi hisobigami ishlagisi kelmayapti desak, bu ham achchiq haqiqat. Mana shu muammoni hal qilshni birdan-bir yo‘li — sotuvchi bilan xaridor o‘rtasida shaffoflikni ta’minlash. Buning uchun Iqtisodiyot va sanoat vazirligi qoshida elektron portal amaliyotga joriy etilmoqda”, — dedi O‘ktamjon Karimov.
Vazir o‘rinbosari ma’lum qilishicha, portalda dastlabki bosqichda davlat ulushi bor barcha korxonalarning reyestri joy oladi.
“Korxonalar nima ishlab chiqaryapti, nimaga talab bor, nima import qilinyapti, nima eksport qilayotgani kabi barcha ma’lumotlar joylashtiriladi. Buning natijasida, respublikaga qaysi tovarlar import bo‘layotgani oydinlashadi. Bundan tashqari, portalda mahalliy ishlab chiqaruvchilarning ham katalogi joylashtiriladi. Ya’ni ularning manzili, nima ishlab chiqarilayotgani va ishlab chiqarayotgan mahsulotining bir nechta rasmi ham o‘rin oladi. Mahsulotlarni portalga joylashtirish bilan har bir tumanda ishchi guruh shug‘ullanadi. Elektron portalni yuritish uchun Iqtisodiyot va sanoat vazirligi qoshida davlat unitar korxonasi tashkil etiladi. Oldi-sotdi jarayonida yuzaga keladigan o‘zaro kelishmovchiliklar arbitraj orqali hal etiladi”, — dedi Karimov.
Ma’lumot uchun, portalda savdo qilish shartnomasi uchun odatdagidan uch barobar kamroq haq to‘lash ko‘zda tutilgan. Onlayn savdolar 24/7 soat davomida barcha uchun ochiq bo‘ladi. Har bir sotuvchi va xaridor o‘zi haqida kamida 10 ta manzil ko‘rsatadi (telefon raqami, elektron manzili va boshqalar). Ko‘rsatilgan manzilga savdo amaliyotlari haqida avtomatik axborot yuboriladi. Portalning domen nomi tasdiqlangan, hozirgi kunda test rejimida ishlamoqda.
Izoh (0)