Аввал хабар берганимиздек, Наманган шаҳри ҳокими Шавкатжон Абдураззоқов бошчилигидаги делегация Покистонда бўлиб турибди.
Шаҳар ҳокимлиги ахборот хизматининг «Дарё»га маълум қилишича, Ўзбекистоннинг Покистондаги элчихонаси томонидан ташкил қилинган сафар давомида бир қанча муҳим келишувларга эришилган.
Жумладан, Наманган муҳандислик-технология институти ва Покистоннинг Миллий енгил саноат университети ўртасида меморандум имзоланди. Битимга мувофиқ, Наманган шаҳрида текстиль маҳсулотларини сертификатлаш лабораторияси ташкил этилади. Икки ОТМ ўртасида қўшма ўқув дастурлари ишлаб чиқилади, ҳамкорликда илмий-тадқиқот ишлари олиб борилади. Йил охирига қадар Наманганга университет профессор-ўқитувчилари ва мутахассислари делегацияси келиши кўзда тутилмоқда.
«Travel Inn Hotel» компанияси томонидан Наманганда 100 ўринли меҳмонхона қуриш таклифи билдирилди. Бунинг учун компания раҳбарияти Ўзбекистонга келиб, мавжуд шарт-шароитларни ўрганади.
«Marhaba Laboratories LTD» компанияси Ўзбекистонда табиий ўсимликлардан ишлаб чиқарилган дори воситаларини Покистонга экспорт қилиш масаласига қизиқиш билдирди. Компания Наманганда шу йўналишда ўз ишлаб чиқаришини ҳам йўлга қўйишни режалаштирмоқда.
Учрашувлар давомида мезбонларга Наманган шаҳрининг салоҳияти, туризм ва текстиль соҳасидаги имкониятлари таништирилди. «Истиқлол текстиль дизайн» («Идеал» бренди) , «Самира Амир текстиль» ҳамда «Габон текстиль» МЧЖ томонидан ишлаб чиқарилаётган текстиль маҳсулотлари, тайёр кийим-кечаклар намуналари тарғиб қилинди.
Сафар давомида Наманган шаҳри ҳокими Шавкатжон Абдураззоқов Панжоб вилояти губернатори Муҳаммад Сарвар ва Лаҳор шаҳри ҳокими Муҳаммад Асиф билан музокаралар олиб борди.
Уларда икки томонлама алоқаларни янада мустаҳкамлаш, вилоятга Покистон инвестицияларини жалб қилиш, Наманганда ишлаб чиқарилган маҳсулотларнинг Покистонга экспортини йўлга қўйиш, Наманган ва Лаҳор ўртасида биродарлашган шаҳарлар мақомини белгилаш масалалари муҳокама қилинди.
Панжоб туризмни ривожлантириш бошқармаси билан Наманган шаҳар ҳокимлиги ўртасида ўзаро туристик салоҳиятни ошириш, икки томонлама сайёҳлар оқимини кўпайтириш, турпакетлар ташкил этиш бўйича ҳамкорлик меморандуми имзоланди. Панжоб археологик ёдгорликлар илмий-тадқиқот маркази «Ахсикент» очиқ осмон остидаги музейини биргаликда ўрганишга қизиқиш билдирди.
Покистоннинг Neo TV телекомпанияси «Аап Ки Аваз» ток-шоусининг Наманган вилоятига бағишланган махсус сонини эфирга узатди. Унинг аудиторияси 50 миллиондан ортиқ кишини ташкил этгани айтилмоқда.
Изоҳ (0)