АҚШда энг бемаъни илмий ютуқлар ва ностандарт ғоялар учун бериладиган Шнобел мукофотлари (Ig Nobel Prize) ўз эгаларига топширилди. Лауреатлар орасидан тагликларни алмаштиришга мўлжалланган машина ихтирочиси, ҳайвонларни дрессировка қилишнинг айрим усуллари шифокорларни ўқитишга ёрдам беришини аниқлаган олимлар ўрин олди, деб хабар беради «РИА Новости».
Мукофот Annals of Improbable Research журнали томонидан «аввалига инсонни кулишга, сўнг ўйлашга мажбур қиладиган» илмий тадиқиқотлар учун топширилади. Мукофотни қўлга киритган кўплаб тадқиқотчиларнинг ишлари бир қарашда бемаънидек туюлса ҳам, уларнинг аксарияти илмий қийматга эга.
Қурилмадан чиқадиган тури овозлар ёрдамида ҳайвонларни дрессировка қилиш технологияси жарроҳларнинг ҳам машғулот билан шуғулланишида яхши фойда беришини аниқлаган уч нафар олим мукофотга лойиқ топилди.
Нидерландиялик ва туркиялик олимлар эса дунёдаги энг ифлос пуллар қайси эканлигини аниқлагани учун мукофотни қўлга киритди. Аниқланишича, Руминия марказий банкининг банкноталарида дори-дармонларга чидамли бактериялар кўп. Улар, ҳатто Америка ва Канада доллари, шунингдек, ҳинд рупиясидан ҳам ифлосроқ эканлиги маълум бўлди.
Эронлик олим Имон Фараҳбахш болаларнинг тагликларини алмаштирувчи машина учун мукофотга лойиқ кўрилди. Аппарат АҚШда патентланган.
Кимё соҳасидаги мукофот беш ёшли болакай кун давомида қанча сўлак ажратишини баҳолаган япониялик олимга насиб этди.
Психология соҳасидаги мукофот эса германиялик Фриц Стракка топширилди. У оғизга ручкани солиб ўтириш инсонни кулишга мажбур этишини ва бу орқали у бахтлироқ бўлишини, бироқ кейинроқ аслида бундай эмаслигини аниқлаган.
Тиббиёт соҳасидаги мукофот Италияда пиширилган ва шу ерда истеъмол қилинган пицца касалликлар ёки ўлим хавфини камайтириши ғоясини илгари сурган Сильвано Галлусга насиб этди.
Анатомия соҳасидаги мукофот 12 йил олдин француз почтачиларининг кийинган ва ечинган кийимларидаги ҳарорат фарқларини ўлчаган Рожер Мюссе ва Буррас Бенгудифга берилди.
Тинчлик бўйича мукофот бошни қашлаганда содир бўладиган ёқимли ҳисларни ўлчовчи шкалани ўрнатган бир нечта олимга топширилди.
Мукофотлар ҳақиқий Нобель лауреатлари томонидан топширилади — жорий йилги маросимда улар тўрт кишини ташкил этди. Ғолибларга гиперинфляция вақтида чиқарилган 10 триллион Зимбабве долларининг банкнотаси топширилади.
Изоҳ (0)