Президентликка номзод демократлар 12 сентябрь куни ўтказилган дебатда АҚШ қўшинларини Афғонистондан чиқариш тарафдори бўлди. Бу ҳақда «РИА Новости» хабар бермоқда.
«Биз қуролли кучларимиздан ҳарбий йўл билан ечиб бўлмайдиган муаммоларни ҳал қилишни талаб қилишда давом этолмаймиз, бомбалар билан ечим тополмаймиз», — деган дебатда сенатор Элизабет Уоррен.
«Мен Афғонистондаги аскарлар сонини оширишга қарши эдим. У ерда қўшинлар бўлиши керак эмас. Уларни уйга қайтарамиз», — деган ўз навбатида сўровнома етакчиси Жо Байден. Унинг айтишича, вице-президентлик пайтларида ҳарбийлар билан бу борада бир неча марта баҳслашган.
Сенатор Берни Сандерс эса барча 10 нафар президентликка номзодлар орасидан фақат у Ироқ ва Афғонистондаги урушларга қарши овоз берганини эслатган. «Душманимиз кимлигини аниқ билмай туриб, 750 миллиард долларни қуролланишга сарфламаслигимиз керак деб ўйлайман», — деб таъкидлаган Сандерс.
Индиана штатидаги Саут-Бенд шаҳри мэри Пит Бутиджич эса ўз навбатида Конгресснинг чет элдаги ҳарбий ҳаракатлар ўтказишга берган рухсатини 3 йилгача чеклашга ваъда берган. Унинг сўзларига кўра, бу АҚШ урушларининг чексиз давом этмаслигини таъминлашнинг ягона йўли.
Аввалроқ, Дональд Трамп АҚШ ва «Толибон» ўртасидаги тинчлик музокаралари якунлангани, уларга қарши янги зарбалар беришни ваъда қилганди. Бунга «Толибон» жангариларининг Кобул марказида содир этган ҳужуми сабаб бўлган.
АҚШ қўшинлари 2001 йилдан бери Афғонистонда. «Толибон» билан тинчлик музокаралари шартига кўра, АҚШ ҳарбийлари Афғонистондан аста-секин чиқиб кетиши керак эди.
Изоҳ (0)