Фарғона вилоятининг Қува туманида МИБ ходимига жароҳат етказилди, деб хабар бермоқда Бош прокуратура матбуот хизмати.
МИБнинг Қува тумани бўлими давлат ижрочиси 22 ёшли Ў.Т қарздор 33 ёшли М.Х. дан алимент ундириш ҳақидаги қарор ижросини таъминлаш мақсадида унинг яшаш хонадонига борган. Фуқаро МИБ ходимининг фаолиятига фаол қаршилик кўрсатиб, темир жисм билан унинг оёғига уриб, тан жароҳати етказган.
Мазкур ҳолат юзасидан 10 сентябрь куни туман прокуратураси томонидан М.Х. га нисбатан Жиноят Кодексининг 219-моддаси 1-қисми (Хизмат вазифасини бажараётган ҳокимият вакилининг қонуний фаолиятига ёки фуқаровий бурчини бажараётган шахсга фаол қаршилик кўрсатиш) билан жиноят иши қўзғатилди. Маълумот учун, ушбу модда бўйича айбдор деб топилган шахс энг кам ойлик иш ҳақининг 50 бараваригача миқдорда жарима ёки 360 соатгача мажбурий жамоат ишлари ёхуд 3 йилгача ахлоқ тузатиш ишлари ёки 1 йилгача озодликни чеклаш ёки 1 йилгача озодликдан маҳрум қилиш билан жазоланади.
Ҳозирда тергов ҳаракатлари олиб борилмоқда.
Сентябрь ойида Риштонда алимент тўламаслик учун МИБ ходимини калтаклаган шахс қўлга олинганди. Август ойида Қашқадарёнинг Косон туманида яшовчи фуқаролардан бири электрдан ноқонуний фойдаланаётганини аниқлаган МИБ ходимларини калтаклаган эди. Июль ойида эса Сурхондарёда электрдан қарзи туфайли тармоқдан узиб қўйилган уй эгалари ҳам МИБ ходимларини дўппослаганди.
Шунингдек, жорий йилнинг июнь ойида Фарғонада 75 минг сўм қарздорликни деб яна бир МИБ ходими калтакланган эди. Тошкентлик аёл МИБ ходимига шапалоқ тортиб, кейин унга туҳмат қилгани ҳам ижтимоий тармоқларда муҳокама бўлганди.
Изоҳ (0)