Олий Мажлиси Қонунчилик палатаси депутати Акмал Умрзоқов Facebook’даги саҳифаси орқали депутатликка номзодини қўймоқчи бўлган блогерларни танқид қилди. Депутат постини ўчириб юборган. Блогер Дима Қаюм эса унинг бу мулоҳазаларини кўчириб олиб, ўз саҳифасида эълон қилди.
Депутатликка номзод қўйсам ўтаман, деб фикрлайдиган кети тоза блогер-у, бировни ҳақини ейишдан уялмайдиган печкачи ва ўзига ўзи ‘смартгов консултант’ дейдиганлар кўпайиб кетди. Қизиқ номзодларнинг турлари... Ҳамма хилидан борей...Ҳаттоки, бир ‘ақлли’ бухоролик нима эмиш, депутатлик дастурини ёзгандим, дейди. Аҳад Қаюмми, лаҳад луқумми бу блогер, фарқи йўқ, бу масхарабозларга... Депутат манифест ёзадими ҳеч бир дунёда. Яна умидим сўниб боряпти, мен ғалаба қилолмайманмиш. Ўзингча 13 000 подписчик (шундан ярми сохта аккаунт, ярми аллақачон делетед бўлган) дунёни ҳар бир бурчагидан йиғилиб, сенга мухлис бўлгани кетингни кўтардими дейман. Сайланиш учун камида биласанми қанча сайловчи бўлиш керак бир округда ҳавасманд номзод?! Ўтган сайловда ўртача 165 000 эди. Фикр қил, бу рақам сенинг каналингдаги обуначилардан камида ўн икки марта кўп ва камида шуларнинг ярми сени ёқлаши керак.Сал, туш эшагингдан. Эҳ, сайлов нима билмайсан-да. Ота-онангга эмас, ўйнашига, онанг идеали учунмас, даданг ёмон кўрган қўшнига овоз беради. Амакиваччанг, холаваччанг нега у энди номзод бўлибди, менинг боламни нимаси кам ундан, дейди ҳасад аралаш. Сайлов участкаси жойлашган мактабларда эса, ‘келажак бунёдкорлари’ беш йилда бир ҳосил йиғади.
— Анаққиса ука, ман сиз томонга ҳаммани оғдириб берардим, дейди оғзидан вино ҳиди анқиб участка коммиссияси раиси бўлган ўзини локациясини унутган география ўқитувчиси. У бу гапни ҳар бешала номзодга айтиб, сайлов ўтгунча ‘гайгуй’ қилиб яшайди. У раис ўзича қув, ўзича шустрий бўлади. Сайлов ўтгунча кунора отиб қолиб, маза қилиб яшайди ‘демократия’ саҳнасида.
Сайлов кўрмаган кимлардир эса ўзича депутат бўлсам, дунёни тескари айлантираман, деганча ўй-хаёл сураверади. Айтганча, депутатлик бу мансаб, мартаба, рутба эмас. Ҳозирдан номзодимни ўтказишмаяпти, деб жар солманг ўзича ‘публикага’ ўйнайдиганлар.
Аллоҳ назар қилмаса, сен ўзингни ‘смартгов’ бўйича мутахассис дейсанми ёки бошқа эшак бозорга ҳам даллол бўлмайсан. Парламент циркка айланишига йўл қўймайди бу закий халқ. Йўл қўймасин ҳам илоҳим.
Акмал Умрзоқов, Олий Мажлиси Қонунчилик палатаси депутати
Акмал Умрзоқов 2018 йил декабрида прописка режимини оқлаб чиққан ва унинг бекор қилиниши жиноятчилик кўпайиб кетишига олиб келиши мумкинлигини таъкидлаганди.
Маълумот учун, Акмал Умрзоқовнинг постини эълон қилган, ижтимоий тармоқларда Дима Қаюм тахаллуси билан ижод қилувчи риштонлик Дилшод Болтабоев бу йил депутатликка ўз номзодини қўйишга бел боғлаган. Дилшод Болтабоев савдо-сотиқ билан шуғулланади, у сотадиган асосий маҳсулот печка ҳисобланади.
Изоҳ (0)