Twitter Instagram’да аккаунт очиб, рақибини «тролл» қила бошлади

Twitter ижтимоий тармоғи Instagram ижтимоий тармоғидаги аккаунти орқали твитларининг скриншотини жойлаштириб бормоқда, деб хабар беради Meduza.

Instagram дастлаб фойдаланувчилар ўзларининг суратлари билан бўлишиши мумкин бўлган ижтимоий тармоқ сифатида яратилган эди, бироқ вақт ўтиши билан у ерга ҳамма нарса жойлаштириш мумкин бўлиб қолди: мемлар, узун матнлар, мусиқий клиплардан парчалар.

Кўпчилик Instagram’га кулгили твитларнинг скриншотларини жойлаштиради. Бу шу қадар кўп содир бўладики, ижтимоий тармоқда «Twitter скриншоти — бу мем эмас» деган тушунча шаклланиб қолди. Трендга Twitter’даги @Miagrassia28 ники остидаги фойдаланувчи эътибор қаратди. У Twitter’нинг расмий аккаунтини қайд этиб, компанияга Instagram билан бу борада гаплашиб олиш маслаҳатини берди.

Twitter эса Instagram’да аккаунт очиб, @Miagrassia28’нинг олтита постига бўлинган скриншотини жойлаштирди.

Instagram’даги Twitter аккаунтининг вазифаси битта — у твитлар скриншотини жойлаштириб боради. Instagram’нинг Twitter’даги аккаунти эса ушбу вазиятга ҳеч қандай муносабат билдирмаган.