Туризмни ривожлантириш давлат қўмитаси раиси в.в.б. Абдулазиз Аққулов Париждаги Ўзбекистон элчихонасида Франция туроператорлар уюшмаси бош котиби Юрген Бахманн билан учрашди. Бу ҳақда Туризмни ривожлантириш қўмитаси матбуот хизмати хабар бермоқда.
Учрашув давомида томонлар қатор келишувларга эришди.
Хусусан, Юрген Бахманн жорий йилнинг 1—4 октябрь кунлари Францияда бўлиб ўтадиган Top Resa—2019 халқаро ярмаркасига Ўзбекистон делегациясини таклиф этди.
Ўзбекистон томон ушбу халқаро ярмаркада ўз стенди билан қатнашиши ҳамда тадбир доирасида Франция ОАВ вакиллари учун матбуот анжумани ташкил этилиб, журналистлар ҳамда франциялик туроператорларга мамлакатнинг туристик салоҳияти тақдимоти ўтказилишига келишилди.
Шунингдек, Top Resa—2019 доирасида Франция туроператорлар уюшмаси халқаро ярмарка ташкилотчилари билан биргаликда Франциянинг туризм бозори ва умуман, мамлакатдаги туризм ҳолати бўйича бўлиб ўтадиган йиғилишида Ўзбекистон ҳақида сўз юритилиб, унинг туристик салоҳияти тақдимотини тадбир дастурига қўшиши қўшимча қилинди.
Таъкидлаш жоизки, Юрген Бахманн Германия, Африка давлатларида Франция бозори спецификаси бўйича маърузалар ўқийди. Шу боис, у келгусида Самарқанддаги «Ипак йўли» халқаро туризм университетида талабалар учун уч кунлик маъруза ўқишига келишилди.
Шу билан бирга, Ўзбекистонга ташрифи доирасида маҳаллий туроператорлар билан ҳам Франция бозори спецификасига оид маълумотлар билан бўлишади. Бундан ташқари, шу йилнинг 13—15 ноябрида пойтахтда бўлиб ўтадиган «Тошкент халқаро туристик ярмаркаси—2019» (ТХТЙ—2019)да илгари Ўзбекистон билан ишламаган туроператорлар иштирокини таъминлашга доир келишувга эришилди.
Франциялик туроператорлар Ўзбекистонга ташрифи давомида ҳам ТХТЙ—2019 тадбирида қатнашади, ҳам маҳаллий туризм бозори билан танишади.
Изоҳ (0)