Mercedes-Benz Sprinter’ни «келажак автоуйи»га айлантиришди

Ихчам автоуйлар ва ғилдирак устидаги уйларни ишлаб чиқариш билан шуғулланувчи Германиянинг Hymer компанияси саёҳатлар учун мўлжалланган VisionVenture номли шор-карни тақдим этди, деб хабар беради Motor.

Мазкур машинани йиғиш учун 20 турдаги инновацион материаллардан фойдаланилган бўлиб, уларнинг айримлари 3D-принтерлар ёрдамида яратилган.

Янги Mercedes-Benz Sprinter базасида қурилган кемпер икки киши учун мўлжалланган. Кўтарма том ётоқхона вазифасини ўтайди, «Палатка»нинг шиширма деворлари қалинлиги эса салкам етти сантиметрга тенг. Уни совуқ ёки иссиқ ҳаво билан 60 сония ичида тўлдириш мумкин.

Автомобиль кузови тўқ яшил рангли махсус бўёқ билан қопланган бўлиб, бу ҳароратни мўътадиллаштириш имконини беради: у автомобиль юзасидаги ҳароратни 20 даража Цельсийгача пасайтириб, салон ичини тўрт даражага қадар совутиши мумкин.

Автоуйнинг «биринчи қавати»да ювиниш хонаси ва раковина жойлашган. Шунингдек, ошхона ва «ётоқхона»га кўтарилиш мумкин бўлган зиналар диод лампалари билан ёритилган. Юқорида санаб ўтилганлардан ташқари VisionVenture’да йиғма электр барбекю ҳам мавжуд.

Hymer вакилларининг сўзларига кўра, беш йилдан сўнг кемперлар худди шу кўринишда бўлади. VisionVenture’нинг айрим элементларини келажакда серияли автоуйларники каби ишлаб чиқариш режалаштирилган, бироқ у оммавий ишлаб чиқаришга қўйилмайди.