Кутилмаган пешқадам, «Бавария»дан голлар ёмғири ва «Боруссия Д»нинг қоқилиши. Бундеслигада тур тафсилотлари

30 августдан 1 сентябрга қадар футбол бўйича Германия Бундеслигасининг 3-тур учрашувлари ўтказилди. «Дарё» одатдагидек турнинг муҳим воқеалари билан ўртоқлашади.

«Боруссия М» — «Лейпциг»

Турнинг марказий ўйини Мюнхенладбах шаҳрида бўлиб ўтди. Унда «Боруссия» клуби «Лейпциг» билан баҳс олиб борди. Ўйин тенг курашлар остида ўтган бўлсада, «буқалар» вазиятлардан фойдаланишда яхшироқ ҳаракат қилди. Биринчи бўлим якунланиши арафасида ва иккинчи бўлим дебютида Тимо Вернер мезбонлар дарвозасини икки бор ўққа тутди.

Учрашувнинг сўнгги дақиқалари ҳам қизиқарли ўтди. Ҳакам томонидан қўшиб берилган вақтнинг илк дақиқасида Брил Эмболо ҳисобни қисқартириб майдон эгалари учун умид учқунларини ёқди. Бироқ орадан уч дақиқа ўтиб Вернер учинчи голини урган ҳолда якуний ҳисобни ўрнатди.

Шу тариқа, Юлиан Нагелсман шогирдлари 9 очко билан якка пешқадамга айланди.

«Бавария» — «Майнц»

Амалдаги чемпион ўз майдонида «Майнц» билан ўйнади. Аввалига ўз дарвозасидан тўп олиб чиққан мюнхенликлар якунда йирик ҳисобдаги ғалабани тантана қилди. Жан-Поль Бутюснинг голига «Бавария» Бенжамен Павар, Давид Алаба, Иван Перишич, Кингсли Коман, Роберт Левандовски ва Альфонсо Дэвисларнинг киритган тўплари билан жавоб қайтарди.

Илк турда дуранг ўйнаб қўйган Нико Ковач шогирдлари кетма-кет икки ўйинни йирик ҳисобдаги ғалаба билан якунлади ва мусобақа жадвалида иккинчи ўринга кўтарилди. «Майнц» эса бирорта ҳам очко тўплай олмаган ҳолда сўнгги поғонада бормоқда.

«Унион» — «Боруссия Д»

Тур сенсацияси Берлинда рўй берди. Унда «Унион» Дортмунднинг «Боруссия»сини доғда қолдирди. Биринчи бўлим қоқ ярмига етганида Мариус Бюльтер пойтахт вакилини олдинга олиб чиқди. Орадан уч дақиқа ўтар-ўтмас Пако Алькасер мувозанатни тиклашга эришди.

Иккинчи бўлим бошида яна ўша Бюльтер мезбонларнинг иккинчи голини урган бўлса, 75-дақиқада Себастиян Андерссон ўйинга якуний нуқтани қўйди.

Шу тариқа, мавсумни кўтаринки руҳда бошлаган «Боруссия» Бундеслига дебютантига имкониятни бой бериб қўйди. «Унион» эса дастлабки уч очкога эга чиқди.

Тур рақамлари

Мазкур турда дарвозалар жами 31 марта ишғол қилинган бўлса, голларнинг 20 таси мезбонлар томонидан урилди.

Ҳозирча тўртта жамоа мағлубиятга учрамади («Лейпциг», «Бавария», «Вольфсбург», «Байер»), яна тўртта клуб («Майнц», «Ҳерта», «Аугсбург», «Падерборн») ғалаба нималигини билмай келмоқда.

Бундеслига

3-тур баҳслари

30 август, жума

«Боруссия М» — «Лейпциг» 1:3

Голлар: 0:1 — 38 Вернер, 0:2 — 48 Вернер, 1:2 — 90 Эмболо, 1:3 — 90 Вернер

31 август, шанба

«Бавария» — «Майнц» 6:1

Голлар: 0:1 — 6 Боэтиюс, 1:1 — 36 Павар, 2:1 — 45 Алаба, 3:1 — 54 Перишич, 4:1 — 64 Коман, 5:1 — 78 Левандовски, 6:1 — 80 Дэвис

«Байер» — «Ҳоффенҳайм» 0:0

«Вольфсбург» — «Падерборн» 1:1

Голлар: 0:1 — 12 Каули, 1:1 — 56 Брекало

«Фрайбург» — «Кёльн» 1:2

Голлар: 1:0 — 40, автогол Чихос, 1:1 — 52 Модест, 1:2 — 90 Схири

«Шальке-04» — «Ҳерта» 3:0

Голлар: 1:0 — 38, автогол Штарк, 2:0 — 48, автогол Рекик, 3:0 — 85 Кенни

«Унион Берлин» — «Боруссия Д» 3:1

Голлар: 1:0 — 22 Бюльтер, 1:1 — 25 Пако Алькасер, 2:1 — 50 Бюльтер, 3:1 — 75 Андерссон

1 сентябрь, якшанба

«Вердер» — «Аугсбург» 3:2

Голлар: 1:0 — 6 Осако, 1:1 — 12 Варгас, 2:1 — 21 Сарджент, 2:2 — 46 Варгас, 3:2 — 67 Осако

Айнтрахт Ф» — «Фортуна» 2:1

Голлар: 0:1 — 36 Хеннингс, 1:1 — 57 Дост, 2:1 — 86 Пасиенсия

Турнир жадвали

Тўпурарлар рўйхати

Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!