«Севилья» — «Сельта»
Тур жума оқшомида етакчи «Севилья» иштирокидаги ўйин билан старт олди. Севильяликлар ўз майдонида «Сельта»ни қабул қилди. Учрашувнинг сўнгги дақиқалари қизиқарли руҳда ўтди. Дастлаб 81-дақиқада Франко Васкес майдон эгаларини олдинга олиб чиқди. Бироқ орадан кўп вақт ўтмай ушбу трансфер ойнасида виголиклар сафига қўшилган Денис Суарес мувозанатни тиклади.
Шу тариқа, ўтган икки турда 100 фоизлик натижа қайд этган Хулен Лопетеги шогирдлари учинчи турга келиб очко йўқотди ва мусобақа жадвалида учинчи ўринга тушиб қолди.«Осасуна» — «Барселона»
Яна бир қизиқарли баҳс Памплонада бўлиб ўтди. Жароҳатлар сабаб бир қатор етакчиларидан айрилган «Барселона» «Осасуна» майдонида меҳмон бўлди. Аввалига мезбонлар 7-дақиқада Роберто Торреснинг голидан кейин олдинга ўтиб олди. Бунга каталонлар иккинчи бўлим дебютида жавоб қайтарди, 51-дақиқада 16 ёшли Ансумане Фати ҳисобни тенглаштирди. Натижада Фати «Барселона» сафида Ла Лигада гол урган энг ёш футболчига айланди.
64-дақиқада эса Артур Мело ўзининг аниқ зарбаси билан «Барселона»нинг иккинчи голини урди. Ўйин охирлаб бораётган бир вақтда ҳакам меҳмонлар дарвозаси томон пенальти белгилади. Уни Торрес аниқ амалга оширган ҳолда жамоасига ғалабага тенг дурангни тақдим этди.
Таъкидлаш жоиз, мазкур ўйинда «кўк-анорранглилар» Лионель Месси, Луис Суарес ва Усмон Дембеле каби етакчилар хизматидан фойдалана олмади. Эрнесто Вальверде шогирдлари уч турдан кейин биттадан ғалаба, дуранг ва мағлубият қайд этган ҳолда турнир жадвалида 8-ўринда бормоқда.«Атлетико» — «Эйбар»
«Атлетико» бу турда ўз майдонида «Эйбар» билан куч синашди. Ўйин кутилмаган сценарий остида бошланди. Дастлаб меҳмонлар Шарлес ва Анайц Арбильянинг голларидан кейин олдинга ўтиб олди. Бунга «матрасчилар» биринчи бўлимда Жоау Феликснинг аниқ зарбаси билан жавоб қайтарди.
Иккинчи бўлим бошида Витоло мувозанатни тиклашга эришди. Асосий вақтнинг сўнгги дақиқаси ўтиб бораётган бир вақтда Томас Парти «Эйбар» жарима майдони ичида ажойиб ҳаракат қилиб, мадридликларга уч очко тақдим этган голга муаллиф бўлди.
Шу тариқа, Диего Симеоне шогирдлари Ла Лига ушбу мавсумида очко йўқотмаган ягона жамоа бўлиб қолмоқда ва турнир жадвалида якка пешқадамга айланди.
«Вильярреал» — «Реал Мадрид»
Турнинг сўнгги ўйинида «Реал» сафарда «Вильярреал»га қарши баҳс олиб борди. Учрашувни яхши бошлаган мадридликлар 12-дақиқада Серхио Рамоснинг хатосидан кейин гол ўтказиб юборди. Шундан кейин ташкил этилган бир қатор ҳужумлар танаффус арафасида самара берди. Биринчи бўлимга ҳакам томонидан қўшиб берилган вақтда Гарет Бэйл ҳисобни тенглаштиришга эришди.
Иккинчи бўлимда ҳам майдон эгалари кам сонли ҳужумлардан бирини гол билан якунлади. 74-дақиқада Мойсес Гомес яна мезбонларни олдинга олиб чиқди. Ўйин якунланиши арафасида Бэйл қойилмақом зарбаси билан мувозанатни тиклади. Учрашув кескинлик ва қўполликларга бой бўлди. Иккинчи бўлимга қўшиб берилган дақиқаларда Бэйл икки дақиқа ичида иккита сариқ карточка олиб майдондан четлатилди.
Бу турдан кейин ФИФА кунларининг бошланиши кўпчилик клублар қатори Зинедин Зидан жамоасига ҳам қўл келадиган кўринади. Икки ҳафтадан кейин бошланадиган 4-тур учрашувларига қадар бир қатор жароҳатдаги футболчилар сафга қайтиши кутилмоқда. Хабарингиз бор, сўнгги бир ой ичида мадридликларнинг саккизта футболчиси жароҳат сабаб сафдан чиқди.
Тур рақамлари
Ушбу турда жамоалар жами 29 та гол уришга эришди ва ҳеч қайси ўйинда нурсиз дуранг қайд этилмади. Бир ўйинда йирик ҳисоб қайд этилган бўлса, тўртта учрашувда жамоалар муроса йўлини танлади.Ҳозиргача фақат «Атлетико» турнир жадвалида йўқотишсиз келмоқда. Шунингдек, битта жамоа («Леганес») ҳали очко тўплай олгани йўқ. Ортда қолган учта турда ҳам голлар ҳисобини оча олмаган жамоа «Эспаньол» бўлиб турибди.
Ла Лига
3-тур баҳслари
30 август, жума
«Севилья» — «Сельта» 1:1
Голлар: 1:0 — 81 Васкес, 1:1 — 84 Денис Суарес.«Атлетик» — «Реал Сосьедад» 2:0
Голлар: 1:0 — 11 Уильямс, 2:0 — 28 Рауль Гарсия.31 август, шанба
«Осасуна»—«Барселона» 2:2
Голлар: 1:0 — 7 Роберто Торрес, 1:1 — 51 Фати, 1:2 — 64 Артур, 2:2 — 81, пенальти, Роберто Торрес«Хетафе»—«Алавес» 1:1
Голлар: 1:0 — 24 Молина, 1:1 — 31 Хоселу«Леванте»—«Вальядолид» 2:0
Голлар: 1:0 — 83 Леон, 2:0 — 90 Моралес«Бетис»—«Леганес» 2:1
Голлар: 0:1 — 50 Брэйтуэйт, 1:1 — 54 Морон, 2:1 — 61 Фекир1 сентябрь, якшанба
«Валенсия»—«Мальорка» 2:0
Голлар: 1:0 — 43, пенальти Парехо, 2:0 — 57, пенальти Парехо«Атлетико»—«Эйбар» 3:2
Голлар: 0:1 — 7 Шарлес, 0:2 — 19 Арбилья, 1:2 — 27 Жоау Феликс, 2:2 — 52 Витоло, 3:2 — 90 Томас«Эспаньол»—«Гранада» 0:3
Голлар: 0:1 — 13 Пуэртас, 0:2 — 68 Фернандес, 0:3 — 74 Азиз«Вильярреал»—«Реал» 2:2
Голлар: 1:0 — 12 Жерар Морено, 1:1 — 45 Бэйл, 2:1 — 74 Мойсес Гомес, 2:2 — 86 БэйлМусобақа жадвали
Тўпурарлар рўйхати
- Лоренцо Морон («Бетис») — 3 та гол
- Херар Морено («Вильярреал») — 3 та гол
- Карим Бензема («Реал») — 2 та гол
- Антуан Гризманн («Барселона») — 2 та гол
- Серхио Гвардиола («Вальядолид») — 2 та гол
- Рохер Марти («Леванте») — 2 та гол
- Витоло («Атлетико») — 2 та гол
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)