«Ўзбекистон» халқаро анжуманлар саройида 31 август куни Ўзбекистон мустақиллигининг 28 йиллигига бағишланган байрам тантанаси бўлиб ўтди. Унда сўзга чиққан Президент Шавкат Мирзиёев тадбир иштирокчилари, кўпмиллатли Ўзбекистон халқини байрам билан табриклади, дея хабар бермоқда давлат раҳбарининг матбуот хизмати.
«Бугун бир ҳақиқатни катта ғурур ва ифтихор билан айтишга тўла асосимиз бор: мард ва матонатли халқимиз қанчалик қийин ва оғир синовларга дуч келмасин, ўзининг мустаҳкам иродасини намоён этиб, ўзи танлаб олган мустақиллик йўлига доимо содиқ бўлиб келмоқда. Бугун Ўзбекистон ўз тараққиётининг янги босқичига дадил қадам қўймоқда», — дея таъкидлади Президент.
«Биз бугун қандай ислоҳотларни, қандай ўзгаришлар, қандай янги лойиҳаларни амалга ошираётган бўлмайлик, уларнинг барча-барчаси ягона, улуғ бир мақсадга қаратилган. У ҳам бўлса, мана шу меҳнаткаш, заҳматкаш, олижаноб халқимизни рози қилиш, ҳаётнинг барча синовларини матонат билан енгиб яшаётган ватандошларимизнинг ишончини оқлаш, оғирини енгил қилишдан иборатдир», — деди Шавкат Мирзиёев.
Президент ўз нутқида суд-ҳуқуқ тизимини такомиллаштириш, ҳақиқий бозор иқтисодиётига ўтиш, тадбиркорликни қўллаб-қувватлаш, саноат ва қишлоқ хўжалигини модернизация қилиш борасидаги ишларнинг моҳияти ва натижалари ҳақида тўхталган. Ижтимоий ривожланиш бўйича ўзига хос тизим шакллангани, ҳудудларни обод қилиш, аҳолининг ҳаёт сифатини ошириш, ёш авлодни баркамол этиб тарбиялашга катта эътибор қаратилаётганини таъкидлаган.
«Бугун бир фикрни қатъият билан таъкидлашни зарур деб биламан: Ўзбекистондаги демократик жараёнлар энди орқага қайтмайдиган, муқаррар тус олди. Биз мана шу ёруғ кунлар учун курашиб, жон фидо этган ота-боболаримизнинг ҳаққи-ҳурмати, 33 миллионлик халқимизнинг ҳаққи-ҳурмати, бизга умид ва ишонч кўзи билан боқиб турган болаларимиз, набираларимизнинг ҳаққи-ҳурмати — мустақиллик ва истиқлол йўлидан ҳеч қачон қайтмаймиз! Ўз мақсадларимизга албатта етамиз – келажаги буюк Ўзбекистонни барчамиз биргаликда барпо этамиз!», — деди Президент.
Изоҳ (0)