Қашқадарё вилоятидаги раҳбарлар Шаҳрисабз шаҳар ва туманида яшовчи 13 нафар чин етим болани оталиққа олди. Бу ҳақда «Дарё»га вилоят ҳокимлиги матбуот хизмати раҳбари Аҳрор Содиқов маълум қилди.
Унга кўра, эндиликда вилоятдаги боқувчисини йўқотган ва яқинлари қарамоғида яшаётган ёшлар тўртта сектор ва ташкилот раҳбарлари томонидан оталиққа олинади. Бу хайрли амални вилоят ҳокими Зафар Рўзиев 29 август куни Шаҳрисабз шаҳрида мустақилликнинг 28 йиллик тантаналарига бағишланган тадбирда бошлаб берган.
— Президентимиз «Ёшлар билан тенг бўлиб, улар қалбидаги, юрагидаги ўй-фикрлар, мақсад-муддаолар, керак бўлса, ушалмай турган ниятлари билан яқиндан танишишни ўз фаолиятимнинг энг муҳим жиҳати деб биламан», дея таъкидлаганликлари ҳам бежизга эмас. Шундай экан, биз раҳбарлар ҳам ёшларимизнинг тақдирига бефарқ қараш фикридан йироқмиз. Айниқса, боқувчисини йўқотган болажонлар, ёшлар ҳар томонлама кўмакка муҳтож. Уларни сектор раҳбарлари оталиққа олиб, таълим олишларига, моддий ва маънавий масалаларига кўмаклашади, — деб таъкидлаган вилоят ҳокими.
Маълум қилинишича, учрашувда ёшларнинг қизиқишларига қараб сектор раҳбарлари ва бошқа вилоят ташкилоти раҳбарлари оталиққа олган.
— Ички ишлар ходими бўлишни орзу қилардим. Бугун вилоят ИИБ бошлиғи Дилшод Турсунбоев ушбу орзумнинг амалга ошиши учун ҳар томонлама қўллаб-қувватлашини айтди. Мен эса аъло баҳоларга ўқиб, одобли бола бўлишим кераклигини таъкидлади. Ўртоғим Нодир эса ҳоким бўлмоқчи. Уни вилоят ҳокими оталиққа олди, — дейди ўқувчи Жаҳонгир Усмонов.
Маълумот ўрнида, тадбирда вилоят ҳокими 1 нафар, вилоят ИИБ бошлиғи 5 нафар, солиқ инспекцияси бошлиғи 2 нафар ҳамда вилоят прокурори 1 нафар болани оталиққа олган.
Қолаверса, вилоят халқ таълими бошқармаси бошлиғи Бекзод Жўраев 1 нафар, Соғлиқни сақлаш бошқармаси бошлиғи Дониёр Турсунов эса 3 нафар болани ўз қарамоғига олган.
Изоҳ (0)