Андижон вилоятида туркиялик инвесторлар томонидан кунига 15 мингдан ортиқ, йилига эса 4,5 миллион йўловчига хизмат кўрсатувчи замонавий халқаро аэропорт қурилади. Бу ҳақда «Дарё»га вилоят ҳокимлиги матбуот хизмати хабар бермоқда.
Ҳокимлик матбуот хизмати раҳбари Мирзоҳид Ботировнинг маълум қилишича, вилоят ҳокими Шуҳратбек Абдураҳмонов 28 август куни Туркиянинг «МН Груп» компанияси расмийларини қабул қилган. Қабул давомида туркиялик инвесторлар вилоятда янги қурилиши режалаштирилаётган халқаро аэропортнинг икки турдаги таклифий лойиҳаларини тақдим этган.
Водийда ягона бўлиши кутилаётган аэропорт лойиҳасининг умумий қиймати 120 миллион еврони ташкил қилади. Қурилиш ишлари жаҳон андазалари асосида олиб борилади. Агарда ишга тушадиган бўлса, 9 та ички йўналиш ва Россия, Туркия, БАА, Корея давлатлари бўйича ташқи парвозларни амалга оширилади. Бир соатда 6 та рейсни қабул қилиб, кузата олиш, бир кунда 15 мингдан ортиқ мижозга хизмат кўрсатишга эга бўлади.
«Хорижлик ишбилармонлар билан бўлиб ўтган аввалги учрашувлар чоғида вилоят раҳбари Андижонда қишлоқ хўжалик маҳсулотлари экспортини йўлга қўйишда катта имконият борлиги учун, айнан бу йўналишда аэропортда карго ташкил қилиш бўйича ҳам таклиф берган эди, — дейди вилоят ҳокимлиги котибият мудири Шоҳрух Қамбаров. — Таклифга кўра, янги мажмуада мева-сабзавотларни узоқ муддат сақлаб туриш қувватига эга бўлган музлатгичли омборхоналар ҳам ташкил этилади. Бундан кўзланган бош мақсад вилоятимиз ҳудудида етиштирилган мева ва сабзавотларни жаҳон бозорига ўз сифатини сақлаган ҳолда етказиб беришдан иборат».
Маълумот учун, 2017 йилда Тошкент халқаро аэропорти 3 миллиондан ортиқ йўловчига хизмат кўрсатган. Ўзбекистон ҳаво йўллари эса 2018 йилда 21 мингта парвозлар амалга ошириб, 3 миллион йўловчиларга хизмат кўрсатди.
Изоҳ (0)