Андижонда ўзини вилоят ички ишлар бошқармасида терговчи лавозимда ишлашини айтиб, фуқароларни қўрқитиб, товламачилик қилиб юрган шахс қўлга олинди. Бу ҳақда «Дарё»га вилоят ИИБ матбуот хизмати хабар бермоқда.
Маълум бўлишича, жорий йил 25 июндан 16 август кунига қадар бўлган вақт оралиғида «Сардор» деб таништирган фуқаро ўзини вилоят ИИБда терговчи лавозимда ишлашини айтиб, фуқаро Э.Ғ. шахсий ҳаётига оид сир сақланиши лозим бўлган маълумотларни ошкор қилиш ҳамда жиноий жавобгарликка тортиш билан қўрқитиб, ундан 300 АҚШ доллари талаб қилган.
Э.Ғ. ёрдам беришни илтимос қилганида пайтдан фойдаланиб ундан 200 АҚШ доллари, 225 минг сўм бўлган пластик карточкаси ва нархи 950 минг сўмга тенг RedMI А5 русумли мобил телефонини олиб қўйган.
Олинган маълумотга асосан жорий йил 16 август куни ИИВ ўз ҳавфсизлиги бошқармаси вилоят бўйича бўлими ҳамда жиноят қидирув бошқармасининг масъул ходимлари ҳамкорлигида тезкор тадбир ўтказилди.
Ўзини ИИБ ходими «Сардор» деб таништирган шахс бошқарувида бўлган Matiz русумли автомашина тўҳтатиб текшириб кўрилганида, автомашина салони ва юкхонасида фуқаро Э.Ғ га тегишли бўлган пластик карточка, қўрқитиш йўли билан унинг номидан ёзилган тушунтириш хати борлиги аниқланди.
Мазкур ҳолат юзасидан ўтказилган суриштирув ишлари давомида ушбу фуқаронинг асл исми бошқа эканлиги, ички ишлар идоралари тизимида умуман фаолият юритмаслиги маълум бўлди.
Ҳолат юзасидан фуқаро А.А га нисбатан 2019 йилнинг 16 август куни Андижон шаҳар ички ишлар органлари фаолиятини мувофиқлаштириш бошқармаси ҳузуридаги тергов бўлими томонидан Жиноят Кодексининг 165-моддаси 1-қисми билан жиноят иши қўзғатилди. 17 август куни судда айбланувчи тариқасида иштирок этишга жалб қилиниб, шу кундан бошлаб унга нисбатан жиноят ишлари бўйича Андижон шаҳар суди томонидан қамоққа олиш эҳтиёт чораси қўлланди.
Изоҳ (0)