«Барселона» ютқазган, «Реал» чиройли голлар урган, «Атлетико»нинг 126 млн евролик юлдузи жароҳат олган Ла Лиганинг 1-тур тафсилотлари

Мухлислар катта футболни соғиниб қолган Испания Ла Лигасида ҳам янги мавсумга старт берилди. 16-19 август кунлари 2019/20 йилги мавсумнинг 1-тур ўйинлари бўлиб ўтди. Мавсум боши бўлишига қарамай, жамоалар бир мунча сермаҳсул ўйин намойиш этди. Тур ўз навбатида кутилмаган ва кутилган натижалари билан ёдда қолди. «Дарё» эса анъанага мувофиқ тур тафсилотлари билан бўлишади.

«Атлетик Бильбао»—«Барселона»

Мавсумни ва турни амалдаги чемпион «Барселона» сафарда Бильбаонинг «Атлетик»ка қарши ўйин билан бошлаб берди. Эрнесто Вальверде мазкур ўйинда жароҳат сабаб Лео Мессининг хизматларидан фойдалана олмади. Ва бу сафар ҳам«Барселона» Мессисиз умуман бошқа жамоага айланиб қолишини исботлади. Аксига олиб, «Барселона» биринчи бўлим сўнгига келиб, жароҳат сабаб Луис Суаресдан ҳам айрилди. Шундан сўнг на Усмон Дембеле ва на 120 миллион евро эвазига ёзги трансферлар вақтида олиб келинган Антуан Гризманнинг ўйини ўхшади. Учрашув тақдирини эса захирадан ўйинга қўшилган Ариц Адурис ҳал қилди. 38 ёшли испаниялик ҳужумчи 88-дақиқада яқинда «Атлетик» билан 9 йиллик шартнома имзолаган Иняки Уильямс ўрнига майдонга тушди ва орадан бир дақиқда ўтиб, ўша «қария» Марк Андре тер-Штеген дарвозасига «қайчи» усулида гол урди. Шу тариқа басклар ўз майдонида ўтган ўйинда амалдаги чемпионни тиз чўктиришга эришди.

«Сельта»—«Реал»

Азалий рақиби мағлубиятга учраганидан бохабар бўлиб майдонга тушган Зинедин Зидан шогирдлари Вигода «Сельта»дан устун келди. Мавсум аввалида Родриго, Милитао, Йович, Азар каби футболчиларни сафига қўшиб олган «Реал» «Сельта» билан ўйинга кўплаб йўқотишлар билан борганди. Жумладан, Маркос Асенсио, Ферлан Менди ва Эден Азар жароҳати сабаб мадридликларга ёрдам бера олмади. Аммо уларнинг йўқлигини Гарет Бэйл, Тони Кроос ва Карим Бензема каби ўйинчилар билдирмади. Ўйинда ҳисобни жамоадан кетиши овоза қилинган Гарет Бэйлнинг қойилмақом узатмасидан сўнг Карим Бензема очди. Биринчи бўлим 0:1 ҳисобида «Реал»нинг устунлиги билан якунланди. Иккинчи бўлимнинг 56-дақиқасида Лука Модрич Денис Суаресга нисбатан қўпол ўйнади. Ҳакам эса VAR ёрдамида Модричга қизил карточка кўрсатди. Қайд этиш жоиз, Лука Модрич «Реал»даги 7 йиллик фаолиятида биринчи, 16 йиллик футболчилик фаолиятидаги иккинчи қизил карточкасини олди. Бир киши кам бўлиб қолганига қарамай «Реал» яна икки бор Рубен Бланко дарвозасини ишғол қилди. Аввалига Кроос ўзининг ўта кучли зарбаси билан чиройли гол соҳиби бўлган бўлса, захирадан ўйинга қўшилган Лукас Васкес эса Марсело—Иско—Бензема комбинациясига чиройли якун ясади. «Сельта» эса сондаги устунликдан фойдаланиб, учрашув асосий вақтининг сўнгги дақиқасида гол уриб, ҳисобни бироз қисқартиришга эришди.

Шу тариқа «Реал» мавсумни ишончли ғалаба билан бошлади.

«Валенсия»—«Реал Сосьедад»

Ўтган мавсум якунига кўра, кучли тўртликка кириб Чемпионлар Лигасига қайтишни уддалаган «Валенсия» мавсумни омадсиз бошлади. «Кўршапалаклар» илк турда «Реал Сосьедад»ни «Месталья»да меҳмон қилди. Аввалига 58-дақиқада Кевин Гамейро меҳмонлар дарвозабони Мигел Анхел Мойяни ранжитди. Ҳаммаси «Валенсия» ғалабаси томон кетаётган эди. 95-дақиқада Гамейро Денис Черишевга нисбатан ишлатилган қўполлик учун белгиланган пенальтини кўкка совурди. Ўйинга қўшиб берилган сўнгги дақиқада эса «Реал Сосьедад» пенальти тепиш имкониятини қўлга киритди. Франсис Коклен жарима майдончаси ичида тўпни қўли билан ўйнагани учун иккинчи сариқ карточкани олиб, майдонни тарк этди. Пенальтини эса ёшлар ўртасида Европа чемпионатида Испания термаси билан ғолибликни қўлга киритган Микель Ойарсабаль аниқ амалга оширди.

«Вильярреал»—«Гранада»

Турнинг энг сермаҳсул ўйини эса «Эстадио де ла Серамика» стадионида кечди. Унда мезбон «Вильярреал» «Гранада» билан ҳақиқий жангга киришди. Биринчи бўлимда мухлислар иккита пенальтидан киритилган голларнинг гувоҳи бўлди. Мезбонлар сафида Санти Касорла ўз номини таблога ёздириб қўйган бўлса, меҳмонлардан Вико ҳисобни тенглаштирувчи голга муаллифлик қилди. Иккинчи бўлимда эса ҳисобда қувлашмачоқ бошланди. Мойсес Гомес 53-дақиқада мезбонларни ҳисобда олдинга олиб чиқди. 62-дақиқада эса Мачис мувозанатни тиклади. Орадан 3 дақиқа ўтиб, Жерар Морено мезбонларнинг учинчи голини урди. 73-дақиқада Чуквуэзе «сариқ сувости кемаси»нинг ҳисобдаги устунлигини яна битта голга оширди. Орадан ҳеч қанча ўтмай Роберто Сольдадо ҳисобни қисқартирган бўлса, 81-дақиқада «Гранада» аъзоси Пуэртас ўйиндаги сўнгги голга муаллифлик қилди.

Шу тарзда томонлар 4:4 ҳисобидаги жанговар дурангга имзо чекди.

«Эспаньол»—«Севилья»

«Реал» собиқ устози Хулен Лопетеги қўл остига ўтган «Севилья» Каталония шаҳрига сафар қилиб, «Эспаньол»дан устун келди. Учрашувда ҳисобни 44-дақиқада «Реал»дан ижарага олинган Серхио Регилон очди. Иккинчи гол эса 86-дақиқада Нолито томонидан киритилди. Қайд этиш жоиз, Регилон иккинчи голда ассистент вазифасини бажариб берди.

«Атлетико Мадрид»—«Хетафе»

Турнинг сўнгги ўйини эса Мадридда бўлиб ўтди. Ёзги трансферлар вақтида маблағни аямаган «Атлетико» ўтган мавсум кучли бешликка кирган «Хетафе»ни қабул қилди. Учрашувдаги ягона гол 23-дақиқада «Реал» тарбияланувчиси Альваро Мората томонидан киритилди. Мората «Тоттенҳэм»дан олиб келинган Киран Триппьернинг узатмасини Сория дарвозасига жойлаб қўйди. Асабий тарзда кечган ўйиннинг 38-дақиқасида «Хетафе» аъзоси Молина тўғридан тўғри қизил карточка билан жазоланган бўлса, орадан 4-дақиқа ўтиб, мезбонлар ҳимоячиси Лоди иккинчи сариқ карточкасини олиб майдонни эрта тарк этди. Иккинчи бўлим эса Жоау Феликснинг кичик жароҳат олиб майдонни тарк этиши билан эсда қолди. 126 миллион еврога харид қилинган португалиялик ёш юлдуз аввалига қойилмақом юришидан сўнг пенальти ишлади. Уни Мората кўкка совурди. Орадан 6 дақиқа ўтиб эса футболчи оёқ мушакларидаги оғриқ сабаб ўз ўрнини «Реал»дан олиб келинган Маркос Льорентега бўшатиб берди.