Яккакураш спорт турининг аралаш тури бўйича жаҳон чемпиони Мурод Хонтўраевни пичоқлаган шахсларга нисбатан жиноят ишини кўриб чиқиш бўйича суд жараёни ниҳоясига етди ва суд ҳукми эълон қилинди. Бу ҳақда «Kun.uz» хабар берди.

Фото: Google имагес

2018 йилнинг 26 ноябрь куни Тошкент шаҳридаги «Тошкент савдо маркази» (собиқ «Туркуаз») ҳудудида яккакураш спорт турининг аралаш тури бўйича жаҳон чемпиони Мурод Хонтўраев пичоқлаб кетилганди.

Кейинчалик интернетда ММА жангчиси Мурод Хонтўраевнинг офисига уюштирилган ҳужумга оид видеолар тарқалди.

Хонтўраевнинг пичоқланиши билан боғлиқ ҳолатда қатор шахслар терговга тортилган. Тошкент шаҳар Ички ишлар бош бошқармаси ҳузуридаги Тергов бошқармаси томонидан Ўзбекистон Республикаси Жиноят кодексининг 277-моддаси 2-қисми «б, в» бандлари билан жиноят иши қўзғатилган.

Ўзбекистон Республикаси Олий суд матбуот хизмати вакили Азиз Обидовнинг хабар қилишича, жиноят ишлари бўйича Шайхонтоҳур тумани судида судланувчилар С. Акбаров (1990 йилда Тошкент шаҳрида туғилган, вақтинча ишсиз, муқаддам судланган), И. Абдулаҳатов (1991 йилда Фарғона вилоятида туғилган, вақтинча ишсиз, муқаддам судланган), С. Фатхуллаев (1991 йилда Тошкент шаҳрида туғилган, вақтинча ишсиз, муқаддам судланган), О. Садиков (1985 йилда Тошкент шаҳрида туғилган, муқаддам судланган), Ж. Сайназаров (1988 йилда Тошкент вилоятида туғилган, муқаддам судланмаган), С. Ваденов (1992 йилда Тошкент шаҳрида туғилган, муқаддам судланган) ва Т. Азизовга (1992 йилда Тошкент шаҳрида туғилган, муқаддам судланган) нисбатан жиноят ишини кўриб чиқиш бўйича суд жараёни ниҳоясига етди ва суд ҳукми эълон қилинди.

Мазкур жиноий иш жиноят ишлари бўйича Шайхонтоҳур тумани суди судьяси Акмал Эргашев раислигида ҳамда халқ маслаҳатчилари Б. Муслимов ва М. Мирҳамидовдан иборат суд таркибида кўриб чиқилди.

Суд жиноят иши материалларини ҳар томонлама ва тўлиқ ўрганиб, судланувчиларни Ўзбекистон Республикаси Жиноят кодексининг 104-моддаси (қасддан баданга оғир шикаст етказиш) 2-қисми «е», «к» бандларида кўзда тутилган жиноятларни содир этишда айбдор деб топди.

Судланувчилар юқорида қайд этилган жиноятни 2018 йил 26 ноябрь куни Тошкент шаҳри Шайхонтоҳур туманида жойлашган «Тошкент савдо маркази» мажмуаси биносининг биринчи қаватидаги «Pablo» кафеси ёнидаги офиснинг ичида фуқаролар М. Хонтўраев, С. Зуннунов ва И. Саидовга нисбатан содир этган.

Жиноят ишлари бўйича Шайхонтоҳур тумани суди С. Акбаровга 6 йил 3 ой муддатга озодликдан маҳрум қилиш жазоси, И. Абдулаҳатовга 6 йил 3 ой муддатга озодликдан маҳрум қилиш жазоси, С. Фатхуллаевга 6 йил муддатга озодликдан маҳрум қилиш жазоси, О. Садиковга 6 йил муддатга озодликдан маҳрум қилиш жазоси, Т. Азизовга 6 йил 3 ой муддатга озодликдан маҳрум қилиш жазоси, Ж. Сайназаровга 3 йил озодликдан маҳрум қилиш жазоси ва С. Ваденовга 6 йил 3 ой озодликдан маҳрум қилиш жазоси тайинлади.

Жиноят ишлари бўйича Тошкент шаҳар судига судланувчилар томонидан чиқарилган ҳукмга нисбатан берилган апелляция шикояти қаноатлантирилмасдан ва ҳукм ўзгаришсиз қолдирилди.

2019 йил 22 август куни жиноят ишлари бўйича Шайхонтоҳур тумани судида судланувчилар А. Назаров (1992 йилда Тошкент шаҳрида туғилган, муқаддам судланмаган), Д. Қаюмов (1991 йилда Тошкент шаҳрида туғилган, муқаддам судланмаган) ва С. Ортиқовга (1992 йилда Тошкент шаҳрида туғилган, муқаддам судланган) нисбатан жиноят ишини кўриб чиқиш бўйича очиқ суд жараёни бошланади.

Ушбу судланувчиларга юқорида кўрсатилган судланганлар билан бир гуруҳда бўлганликлари ҳақида айб эълон қилинган.

А. Назаров, Д. Қаюмов ва С. Ортиқов қидирувда бўлганлиги ва энди ушланганлиги сабабли уларга нисбатан юритилган жиноят иши алоҳида кўриб чиқилади.

Мазкур жиноий ишни кўриб чиқиш бўйича судда жиноят ишлари бўйича Шайхонтоҳур тумани суди судьяси Абдулла Абдулхаев раислик қилади.