Анқара шаҳрида 5 август куни Ўзбекистон Ташқи ишлар вазири Абдулазиз Комилов ва Туркия Ташқи ишлар вазири Мавлут Чавушўғлу раислигида Қўшма стратегияни режалаштириш гуруҳининг биринчи йиғилиши бўлиб ўтди. Бу ҳақда Ўзбекистон ТИВ матбуот хизмати маълум қилди.
Вазирлар Шавкат Мирзиёев ва Ражап Тоййиб Эрдоғон ўртасидаги келишувларни амалга ошириш жараёни, 2019 йилда Анқара шаҳрида давлат раҳбарлари раислигида ўтказиладиган Олий даражадаги Ўзбекистон—Туркия стратегик ҳамкорлик кенгашининг биринчи йиғилишига тайёргарлик кўриш доирасида сиёсий, савдо-иқтисодий, туризм, маданий-гуманитар ва бошқа соҳалардаги икки томонлама муносабатларнинг ҳозирги ҳолати ва истиқболларини муҳокама қилган.
Учрашувда Ўзбекистон ва Туркия ўртасидаги ҳамкорликда марказий ўринни савдо-иқтисодий ва инвестиция алоқалари эгаллаши таъкидланган. 2018 йил якунларига кўра икки мамлакат ўртасидаги ташқи савдо айланмаси 40,5 фоизга ошиб, 2 миллиард 172 миллион долларини ташкил этган. Жорий йилнинг январь июнь ойларида мамлакатлар ўртасидаги ташқи савдо айланмаси эса 1 миллиард 142,7 миллион долларни ташкил этиб, 2018 йилнинг шу даврига нисбатан 22 фоизга ошган. Туркия капитали иштирокидаги компаниялар сони 50 фоизга ошиб, 1081 тага етган.
Делегациялар раҳбарлари маданий-гуманитар алоқаларни кенгайтириш масалаларига ҳам эътибор қаратган. Туркия томони Самарқанд шаҳрида ўтказиладиган «Шарқ тароналари» XII Халқаро мусиқа фестивалига ва Қўқон шаҳридаги I Халқаро ҳунармандчилик фестивалига таклиф этилган. Икки мамлакат илмий ва таълим муассасалари ўртасидаги алоқаларни фаоллаштириш истиқболлари кўриб чиқилган.
Музокаралар якунида икки давлат ТИВ раҳбарлари раислигида Қўшма стратегияни режалаштириш гуруҳининг иккинчи йиғилишини 2020 йилда Тошкент шаҳрида ўтказиш тўғрисида келишилган. Абдулазиз Комилов ва Мавлут Чавушўғлу Ўзбекистон ва Туркия ташқи ишлар вазирликлари ўртасида 2020—2021 йилларга мўлжалланган Ҳамкорлик дастурини имзолаган.
Ҳужжатда савдо, инвестиция, туризм, энергетика, транспорт, хавфсизлик, таълим каби долзарб йўналишлар ва бошқа масалалар бўйича ташқи ишлар вазирликлари ўртасида мунтазам маслаҳатлашувлар ўтказишни ҳамда халқаро ва минтақавий ташкилотлар доирасида ҳамкорлик қилиш кўзда тутилган.
Изоҳ (0)