Бухорода «Олмаота—Нукус» йўналишида ҳаракатланаётган автобуснинг ағдарилиб кетишига ҳайдовчини уйқу элитиши сабаб бўлган. Бу ҳақда Бухоро вилояти ИИБ ҳузуридаги тергов бошқармаси «Дарё»га маълум қилди.
4 август куни «Бухоро—Хоразм» (Олмаота—Нукус) йўналишида ҳаракатланиб бораётган йўловчи автобуси йўл чизиғидан чиқиб кетиб, ағдарилгани ҳақида хабар берилган эди. Йўл транспорт ҳодисаси оқибатида автобусда 1 нафар йўловчи воқеа жойида вафот этиб, 2 нафар шахс оғир ва 8 нафар шахс турли даражадаги тан жароҳатлари олган.
Бухоро вилояти ИИБ ҳузуридаги тергов бошқармаси томонидан олиб борилган тезкор ҳаракатлар натижасида ҳолатга ойдинлик киритилган. Van Hool русумли, КЗ545 АПВ13 рақам белгили ушбу йўловчи автобус қозоғистонлик «Юг Транс Лайн» жамияти ҳайдовчиси Рустамжон Алиев бошқарувида бўлган. Рустамжон Алиев уйқу элтиши туфайли Жондор туманидаги «Луқмон» МФЙга қарашли чўл ҳудудидан ўтувчи А-380 халқаро аҳамиятдаги йўл — Бухоро—Хоразм (Олмаота—Нукус) йўналишининг 299-километрида бошқарувни йўқотган. Оқибатда автобус йўл чизиғидан чиқиб кетган ва ағдарилган.
Автобусда жами 46 киши бўлган, улардан 13 нафари қозоғистонлик, 33 нафари эса ўзбекистонлик бўлган.
Авария натижасида 2008 йилда Қорақалпоғистонда туғилган, вояга етмаган Арай Умурзакова воқеа жойида вафот этган. 12 нафар йўловчи эса авариядан сўнг йўловчи транспортлар орқали яшаш манзилларига кетиб қолган. Ҳозирда ушбу фуқароларнинг ҳам шахсини аниқлаш бўйича тезкор-суриштирув ишлари олиб борилмоқда.
Бухоро вилоят ҳокимлиги матбуот хизмати хабарига кўра, вилоят раҳбари Ўктам Барноев йўл транспорт ҳодисаси оқибатида жабрланганлар ҳолидан хабар олиш учун Республика шошилинч тиббий ёрдам илмий маркази Бухоро филиалига келган.
— Мудҳиш авария содир бўлгани ҳақидаги хабар келгач, зудлик билан етиб келинди ва жабрланганлар Газли шаҳарчасидаги шифохонага етказилди. Уларга зарур тиббий ёрдам кўрсатилди. Жабр кўрган ва аҳволи нисбатан хавотирли бўлган 12 нафар фуқаро Республика шошилинч тиббий ёрдам илмий маркази Бухоро филиалига олиб келинди. 8 нафарига шошилинч тиббий ёрдам кўрсатилиб, аҳволи ўнглангач, уйларига рухсат берилди. Қолган 4 нафар беморнинг аҳволи ўртача оғирликда бўлиб, муолажалар давом эттирилмоқда, — деди вилоят соғлиқни сақлаш бошқармаси бошлиғи Илҳом Нарзиев.
Ҳолат юзасидан автобус ҳайдовчиси Рустамжон Алиевга нисбатан Ўзбекистон Республикаси Жиноят Кодексининг 266-моддаси 2-қисми билан жиноят иши қўзғатилиб, дастлабки тергов ҳаракатлари олиб борилмоқда.
Изоҳ (0)