Анқарада 5 август куни Ўзбекистон Ташқи ишлар вазири Абдулазиз Комилов Туркия элчиларининг 11 йиллик конференциясида фахрий меҳмон сифатида иштирок этди ва нутқ сўзлади. Бу ҳақда ТИВ матбуот хизмати хабар берди.
Туркия элчиларининг йиллик конференциялари 2008 йилдан бери Туркия республикасининг барча фавқулодда ва мухтор элчилари иштирокида ўтказилиб келинади. Ушбу тадбир мамлакатнинг сиёсий ва дипломатик фаолиятини такомиллаштириш, халқаро ҳамкорликни ички ва идоралараро мувофиқлаштиришни кучайтириш ва серқирра ташқи сиёсат юритишда муҳим роль ўйнайди.
Бу йилги конференцияга Украина президенти Владимир Зеленский, Иордания ташқи ишлар вазири Айман Сафади, БМТнинг Ливандаги махсус координатори Ян Кубиш, БМТ Бош котибининг Ливия бўйича махсус вакили Гассан Саламе ва бошқа юқори мансабдор шахслар ҳам таклиф этилган.
Ўзбекистон ТИВ раҳбари таъкидлаганидек, 2017 ва 2018 йилларда Президент Шавкат Мирзиёевнинг Туркияга ва Туркия президенти Ражаб Тоййиб Эрдўғоннинг Ўзбекистонга ташрифи бугун стратегик шериклик даражасига кўтарилган муносабатлар тарихида янги саҳифа очди.
Абдулазиз Комилов ўз нутқида жаҳон ва Марказий Осиё минтақасидаги вазиятнинг ҳолати ва ривожланиш истиқболлари бўйича Ўзбекистон қарашлари тўғрисида сўзлаб берди, минтақавий ва глобал таҳдидларга тўхталган, Ўзбекистон Президентининг кенг макроминтақада тинчлик ва барқарор ривожланишни таъминлашга қаратилган ташқи сиёсий ташаббусларини изоҳлаган.
Изоҳ (0)