Ўз вақтида Ўзбекистон бош вазири ўринбосари ва Тошкент вилояти ҳокими лавозимларида ишлаган Ғуломжон Ибрагимов «Биринчи резинотехника заводи» компанияси директори этиб тайинланди, дея хабар бермоқда «Kun.uz».
Ғуломжон Ибрагимов Тошкент вилояти ҳокими лавозимида 2017 йил октябрида пахта ҳосилини қўшиб ёзгани учун ишдан олинган Шукрулло Бобоев ўрнига иш бошлаган эди. У 2018 йил январида Тошкент вилояти ҳокими лавозимига тўла тасдиқланган, 2019 йил июнида эса саломатлиги туфайли лавозимдан озод этилган эди.
Ибрагимов 1958 йил Тошкент вилоятининг Пискент туманида таваллуд топган. 1980 йилда Тошкент политехника институти (ҳозирги Тошкент давлат техника университети)ни, 2003 йилда Президент ҳузуридаги Давлат ва жамият қурилиши академиясининг Олий ишбилармонлик мактабини тамомлаган.
Кўп йиллар давомида Олмалиқ кимё заводида меҳнат қилган, 2004—2010 йилларда «Ўзкимёсаноат» компанияси раиси сифатида фаолият кўрсатган. 2010 йилдан Ўзбекистон ҳукумати таркибида бош вазир ўринбосари сифатида ишлаган.
Маълумот учун, Ангрендаги шина ишлаб чиқариш заводи Ўзбекистон Президентининг 2014 йилдаги тегишли қарорига мувофиқ, қуриб битказилган. Заводда 2018 йил июлдан бошлаб кўп турдаги маҳсулотларни ишлаб чиқариш йўлга қўйилган.
Изоҳ (0)