Ўзбекистон Бош вазири Абдулла Арипов Қирғизистон президенти Сооронбай Жеенбеков билан учрашди. Бу ҳақда Қирғизистон давлат раҳбари матбуот хизматига асосланиб, Sputnik хабар берди.
Қайд этилишича, учрашувда Қирғизистон ва Ўзбекистон ўртасидаги икки томонлама ҳамкорликни янада ривожлантириш истиқболлари, жумладан, чегаралар, энергетика, минтақалараро ва парламентлараро ҳамкорлик масалалари муҳокама қилинди.
Сооронбай Жеенбеков Қирғизистон-Ўзбекистон ҳамкорлигини чуқурлаштириш ҳар доим мамлакат ташқи сиёсатининг устувор йўналишларидан бири бўлишини таъкидлаб ўтди.
Қирғизистон раҳбари барча тегишли масалалар ўзаро манфаатли шартлар асосида ҳал қилиниши зарурлигини таъкидлаб, нафақат Ўзбекистон билан, балки кўп томонлама ҳамкорликни ривожлантиришдан ҳам манфаатдор эканлигини билдирди.Шунингдек, Сооронбай Жеенбеков қирғиз-ўзбек чегарасини делимитация қилишда томонларнинг ижобий ишини мамнуният билан қайд этди ҳамда Қирғизистон ва Ўзбекистоннинг чегарадош минтақалари ўртасидаги ҳамкорликни янада чуқурлаштириш муҳимлигини таъкидлади.
Абдулла Арипов ўз навбатида давлат раҳбарларининг саъй-ҳаракатлари туфайли икки мамлакат ўртасидаги муносабатлар сифат жиҳатдан янги босқичга кўтарилганини, савдо-иқтисодий алоқаларнинг ижобий суръати қайд этилганлигини таъкидлади.
Абдулла Арипов мамлакатлар ўртасида ҳукумат даражасида президентлар томонидан белгиланган барча масалалар, шу жумладан, Қирғизистон ва Ўзбекистон ўртасидаги савдо ҳажмини 1 миллиард долларга етказиш бўйича ишлар олиб борилаётганини таъкидлади.
Изоҳ (0)