«Ўзбекистон ҳаво йўллари« МАК: Boeing 787 Dreamliner самолётлари сотилмайди

Хориж интернет сайтлари, ижтимоий тармоқларда «Ўзбекистон ҳаво йўллари« миллий авиакомпанияси замонавий Boeing 787 Dreamliner самолётларини сотувга қўйганлиги ҳақида хабарлар тарқалди. ЎзА кенг муҳокама қилинаётган ушбу масалага ойдинлик киритиш мақсадида миллий авиакомпания матбуот хизмати билан боғланди.

«Ўзбекистон ҳаво йўллари» миллий авиакомпанияси (Uzbekistan Airways)дан маълум қилинишича, МАК самолётлар паркини унификациялаш ва такомиллаштириш, эксплуатация харажатларини камайтириш, хизмат муддати 15 йилдан ортиқ бўлган ҳаво кемаларини реализация қилишни режалаштирган.

Хусусан, Ил-76ТД (5 дона) (чиққан йили 1982—1992); Ил-114-100 (7 дона) (чиққан йили 1999—2013) ва комплекс тренажёр КТС Ил-114; Boeing - 757-200 (2 дона) (чиққан йили 1999); Boeing - 767-3CBER (2 дона) (чиққан йили 2003- 2004); Boeing - 767 VSF (2 дона) (чиққан йили 1996) сотувга қўйилган.

Қайд этиш керак, самолётлар флотини тўхтовсиз янгилаш зарурати халқаро тажриба ҳисобланади. Жаҳоннинг етакчи авиакомпаниялари самолётлардан ўртача 15—20 йил фойдаланади. Бу эса, йўловчилар томонидан авиакомпаниялар хизматларини танлаш, парвозларнинг хавфсиз ва мунтазамлигини таъминлаш ва техник хизмат кўрсатиш бўйича харажатларни камайтиришга ижобий таъсир кўрсатади.

«Ижтимоий тармоқлардаги бўлаётган муҳокамаларнинг уч муҳим жиҳати қуйидагилар:

1) Юқорида келтирилган рўйхатга тушмаган, Boeing 787 Dreamliner самолётларини сотиш жорий режага кирмаган;

2) Манбада кўрсатилган ва ижтимоий тармоқларда муҳокама қилинаётган самолётларнинг нархи ҳам ҳақиқатга мос келмайди. Шуни назарда тутиш керакки, муайян самолёт моделининг нархи конфигурациясига қараб бир-биридан фарқ қилиши мумкин. Масалан, «Ўзбекистон ҳаво юллари» МАК эксплуатациясидаги Boeing 787 самолётларининг нархи анча паст бўлиб, 115 миллион АҚШ долларидан бошланади.

3) Ҳозирги янги, замонавий самолётлар нархини эътиборга оладиган бўлсак, янги самолётларни сотиб олиш, асосан кредит маблағларини жалб қилиш ёки лизинг орқали амалга оширилиши мумкин.

«Uzbekistan Airways авиакомпанияси жаҳондаги бошқа исталган авиакомпания каби, ўз кредит мажбуриятларига эга. Ҳозирги вақтда кредит мажбуриятлари бўйича тўловлар авиакомпаниянинг ўз шахсий маблағлари ҳисобидан тўла равишда ва ўз вақтида амалга оширилаяпти», дейилади МАК хабарида.