Ёз ойида электр энергиясидаги узилишлар истеъмолчилар томонидан талабнинг ортгани билан боғлиқ. Бу ҳақда «Ҳудудий электр тармоқлари» АЖ бошқарув раиси ўринбосари Феруз Қурбонов журналистлар билан бўлиб ўтган очиқ мулоқотда айтиб ўтди, дея хабар бермоқда «Дарё» мухбири Мусулмонбек Иброҳимов.
Бошқарув раиси ўринбосарининг таъкидлашича, охирги вақтда узилишлар юз бермоқда. Бу бир-икки соат билан боғлиқ эмас, ундан ҳам кўпроқ вақт оралиғидаги узилишлар бўлмоқда.
«Ўтган қиш мавсумида, яъни электр энергиясига энг кўп эҳтиёж бўладиган пайтда 170 миллион киловатт соат электр энергия истеъмол қилинган бўлса, жорий йилнинг июль ойи ўрталарида 198 миллион киловатт соатга етди. Бу ўтган 2018 йилнинг ёз мавсумига қараганда 20 миллион киловатт соат ёки 10 фоиздан ортиқ электр энергия истеъмол қилинган. Ушбу ўсиш оғриқли нуқтамизни кўрсатиб берди. Чунки бунчалик даражада электр энергияга талаб ошиб кетишига тайёр эмас эдик. Шунга қарамасдан, чоралар кўрдик, электр энергиясини етказиб бериш меъёрига келди», — деди. Қурбонов.
Жамият вакили узилишларни олдини олиш мақсадида қисқа ва узоқ муддатли стратегия ишлаб чиқилганини маълум қилди.
«Мисол учун, Тошкент шаҳрининг электр энергиясига бўлган талабини 2021 йилгача таҳлил қиладиган бўлсак, 2018 йил ва 2019 йилнинг олти ойига тадбиркорлик субъектлари учун 1270 мегаваттга техник шарт берган. Ушбу талаб Сирдарёда қурилмоқчи бўлган 1300 мегаваттли станция қувватига тенг дегани. Бу фақат Тошкент шаҳри бўйича. Шундан келиб чиққан ҳолда, барча ҳудудларни анализ қилиб, 2020—2021 йилда тайёргарлик кўриш бўйича дастур ишлаб чиқдик», — дея қўшимча қилди у.
Изоҳ (0)