Самарқанд шаҳридаги 105-сонли мактабгача таълим муассасаси тарбияланувчиси билан боғлиқ ҳодиса юзасидан вилоят мактабгача таълим бошқармаси ўз муносабатини билдирди.
24 июль куни Самарқанд шаҳридаги 105-сонли мактабгача таълим муассасида тарбиячининг эътиборсизлиги сабаб 2014 йилда туғилган Алишер Ҳамидов калтакланиб, сочи қирқилган ҳолати юзасидан Самарқанд вилоят Мактабгача таълим бошқармаси ишчи гуруҳи томонидан ўрганиш олиб борилди. Самарқанд шаҳар мактабгача таълим бўлими тасарруфидаги 105-сонли мактабгача таълим ташкилотида айни пайтда 11 та тўлиқ муддатли гуруҳларда 428 нафар бола тарбияланмоқда. Самарқанд шаҳар мактабгача таълим бўлими бошлиғининг 2019 йил 27 июндаги 127-сонли буйруғи билан муассаса мудираси Дилфуза Раҳимова 27 июндан 6 августга қадар навбатдаги меҳнат таътилига чиқарилган. Шу сабабли МТТ мудираси вазифасини Д.Козимова вақтинча бажариб келган.
Ишчи гуруҳнинг ўрганиши давомида 105-сонли мактабгача таълим ташкилотида тарбияланувчиси Алишер Ҳамидовнинг сочини гуруҳ тарбияланувчи Ж.М. қайчи билан қирққанлиги аниқланди. Тарбияланувчи Алишер Ҳамидовни онаси уйига олиб кетаётган пайтида уни кўзига гуруҳ тарбияланувчиси А.Р. ўйин мобайнида уриб юборилганлиги натижасида кўзи қизариб қолган. Шунингдек, гуруҳ тарбияланувчиларидан бирининг туртиб юбориши натижасида Алишернинг бир дона тепа қисмдаги тиши қимирлаб қолган.
Ўрганиш давомида МТТ тарбиячиси Умида Тагиева Ўзбекистон Республикаси Мактабгача таълим вазирининг «Мактабгача таълим вазирлиги ва унинг тизимидаги ходимлари асосий лавозимларининг малака тавсифлари»да давлат мактабгача таълим муассасаси тарбиячисининг лавозим вазифаларини бузганлиги аниқланди. Хусусан, Умида Тагиева ўз хизмат вазифаларига совуққонлик ва масъулиятсизлик билан қараб, малака талабларида белгиланган хизмат вазифаларини тўлиқ бажармаган. Болаларни назоратсиз қолдирганлиги оқибатида Алишер Ҳамидовнинг жароҳат олиш ҳолати юзага келган. Шу сабабли 105-сон МТТ мудираси вазифасини вақтинча бажарувчи Д.Козимованинг 26 июлдаги 7-К-сонли буйруғига асосан тарбиячи Умида Тагиева билан тузилган меҳнат шартномаси бекор қилинди.
Мактабгача таълим муассасаси мудираси вазифасини вақтинча бажарувчи Д.Козимова ўз хизмат вазифаларини лозим даражада бажармасдан, назоратни сусайтириб юборганлиги сабабли унга нисбатан Меҳнат кодексининг 181-моддаси 1-қисми, 1-бандига асосан «Ҳайфсан» интизомий жазоси қўлланилди.
Ишчи гуруҳининг маълумотида қайд этилишича, муассасанинг 8-гуруҳ ота-оналар қўмитаси раиси Юлдуз Акбарова ота-оналар билан ўзаро келишган ҳолда ўзларининг ташаббуслари билан болаларга шароитни яхшилаш мақсадида 100 минг сўмдан пул йиғиш таклифини киритган. Бу орқали гуруҳга керакли жиҳозларни сотиб олиб, Юлдуз Акбарованинг турмуш ўртоғи томонидан ўрнатиб олишга келишиб олганликлари аниқланди. Айрим ота-оналар ишлаши сабаб, 8 нафар ота-она пулларини тарбиячи Умида Тагиевага бериб кетганликлари аниқланиб, ўрганиш давомида Умида Тагиева ушбу пулларни ота-оналар қўмитаси раиси Юлдуз Акбаровага қайтариб берган. Юлдуз Акбарова ва бошқа 8 нафар ота-она ушбу пулларни ўз зоҳишларига кўра, ўзларининг ташаббуслари билан берганликларини билдириб тушунтириш хати ёзиб берган.
Ушбу ҳолатда ҳам Умида Тагиева ота-оналарнинг ташаббуси билан пул йиғими амалга оширилган бўлса-да, 8 нафар ота-онадан ўз хизмат вазифаларидан четга чиқиб, пул йиғимига аралашган. Шунингдек Умида Тагиева 5000 сўм пулни ҳар ойда ота-оналардан йиғиб олиб, ушбу пулларга ювувчи воситалар, ҳожатхона қоғози, супурги сотиб олиш учун ишлатишини билдирди.
Ўрганиш натижаси бўйича мутахассислар томонидан 105-сонли МТТ мудираси ва ходимларига юзага келган нохуш ҳолатни келгусида такрорланишини олдини олиш бўйича тегишли чора-тадбирлар белгилаб олинди.
Изоҳ (0)