Yoz oyida elektr energiyasidagi uzilishlar iste’molchilar tomonidan talabning ortgani bilan bog‘liq. Bu haqda “Hududiy elektr tarmoqlari” AJ boshqaruv raisi o‘rinbosari Feruz Qurbonov jurnalistlar bilan bo‘lib o‘tgan ochiq muloqotda aytib o‘tdi, deya xabar bermoqda “Daryo” muxbiri Musulmonbek Ibrohimov.
Boshqaruv raisi o‘rinbosarining ta’kidlashicha, oxirgi vaqtda uzilishlar yuz bermoqda. Bu bir-ikki soat bilan bog‘liq emas, undan ham ko‘proq vaqt oralig‘idagi uzilishlar bo‘lmoqda.
“O‘tgan qish mavsumida, ya’ni elektr energiyasiga eng ko‘p ehtiyoj bo‘ladigan paytda 170 million kilovatt soat elektr energiya iste’mol qilingan bo‘lsa, joriy yilning iyul oyi o‘rtalarida 198 million kilovatt soatga yetdi. Bu o‘tgan 2018-yilning yoz mavsumiga qaraganda 20 million kilovatt soat yoki 10 foizdan ortiq elektr energiya iste’mol qilingan. Ushbu o‘sish og‘riqli nuqtamizni ko‘rsatib berdi. Chunki bunchalik darajada elektr energiyaga talab oshib ketishiga tayyor emas edik. Shunga qaramasdan, choralar ko‘rdik, elektr energiyasini yetkazib berish me’yoriga keldi”, — dedi. Qurbonov.
Jamiyat vakili uzilishlarni oldini olish maqsadida qisqa va uzoq muddatli strategiya ishlab chiqilganini ma’lum qildi.
“Misol uchun, Toshkent shahrining elektr energiyasiga bo‘lgan talabini 2021-yilgacha tahlil qiladigan bo‘lsak, 2018-yil va 2019-yilning olti oyiga tadbirkorlik subyektlari uchun 1270 megavattga texnik shart bergan. Ushbu talab Sirdaryoda qurilmoqchi bo‘lgan 1300 megavattli stansiya quvvatiga teng degani. Bu faqat Toshkent shahri bo‘yicha. Shundan kelib chiqqan holda, barcha hududlarni analiz qilib, 2020—2021-yilda tayyorgarlik ko‘rish bo‘yicha dastur ishlab chiqdik”, — deya qo‘shimcha qildi u.
Izoh (0)