Тиббиёт олийгоҳларига тавсия этилган абитуриентлар тиббий кўрикдан ўтказилгандан сўнг ўқишга қабул қилинади. Бу ҳақда Соғлиқни сақлаш вазирлиги вакиллари журналистлар билан бўлиб ўтган очиқ мулоқотда айтиб ўтди, дея хабар бермоқда «Дарё» мухбири Мусулмонбек Иброҳимов.
Анжуманда Тошкент тиббиёт академияси ректори Лазиз Тўйчиевнинг маълум қилишича, тиббий кўрик абитуриент талаба бўлганидан кейин ўқишга имконияти, унда бир нечта офталмологик муаммолар — рангларни танлай олмаслиги ёки кейинчалик тиббий ёрдамда мутахассис сифатида фаолият кўрсатишда маълум бир чегараланган ҳолатларнинг олдини олиш мақсадида ўтказилган.
«Лекин бу йил тиббий маълумотнома бекор қилинди. Агар тиббиёт академияси мисолида оладиган бўлсак, топширилган ҳужжатларнинг ярмидан кўпи ҳудудларда топширилди. Буларни тиббий кўрик қилиш мутлақо имконияти йўқ ва бу норматив ҳужжатларда кўрсатилмаган. Агар абитуриентлар маълум бир тест имтиҳонларидан ўтиб, талабаликка тавсия этилса, уларнинг ҳар бири билан мулоқот қилиб, керак бўлса, тиббий кўрикдан ўтказмоқчимиз», — дея таъкидлади академия ректори.
Лазиз Тўйчиевнинг айтишича, талабаликка тавсия этилган абитуриент тиббий кўрикдан ўтолмаса, абитуриент танлаган учта йўналишнинг қолган иккитасига тавсия этилиши мумкин. Абитуриентда учта йўналишни танлаш имкони бор. Танланган йўналишларнинг аксарият йўналиши тиббиёт эмас, лекин топшираётган имтиҳонлари бир хил бўлган биология ва бир нечта гуманитар йўналишлардир.
«Бу масала муҳокамада. Ўқишга тавсия этилаган абитуриентни ўқишга қабул қилишимиз, маълум бир даражада ўқитишимиз ҳам мумкин. Лекин у ишлай олмайди. Буни тавсия этилган абитуриентларга тушунтирамиз. Уларнинг учта йўналишдан биттасини танлашга ҳаққи бор. Олдиндан абитуриентларга бу нарсани айтишни имкони йўқ. Чунки абитуриентларнинг 60 фоизи ҳудудлардан ариза топширган. Авваллари 10 мингдан зиёд абитуриент ҳужжат топширарди ва уларни тиббий кўригини ўтказардик. Ҳозир ўқишга тавсия этилганлар сони 500 нафар атрофида бўлади. Уларни бир кунда тиббий кўрикдан ўтказиш имконияти бор, — дея қўшимча қилди ректор.
Вазирликнинг фан ва таълим бош бошқармаси бошлиғи Ўктам Исмоиловнинг айтишича, Соғлиқни сақлаш, Адлия ва Олий ва ўрта махсус таълим вазирликлари ҳамда бир қанча тегишли идоралар ушбу ҳужжат устида ишламоқда. Абитуриентлар имтиҳонлардан ўтгунга қадар масалага тўлиқ ойдинлик киритилади.
Изоҳ (0)