24 июль куни Самарқанд шаҳридаги 105-сонли мактабгача таълим муассасида тарбиячининг эътиборсизлиги сабаб 2014 йилда туғилган Алишер Ҳамидов калтакланиб, сочи қирқилган. Мазкур ҳолат юзасидан Алишер Ҳамидовнинг бувиси Насиба Юсупова «Дарё»га мурожаат қилди.
«Дарё» мухбири Фарҳод Норбўтаев ҳолат юзасидан журналистик суриштирув олиб бориб, воқеа қандай бўлганлигини билиш мақсадида дастлаб жабрланувчи Алишер Ҳамидов ва унинг бувиси Насиба Юсупова билан суҳбатлашди.
Насиба Юсупованинг таъкидлашича, 24 июль куни набирасини боғчадан олиб келаётганда унинг сочи қирқилган, тиши синган ва кўзлари қизарган ҳолатда бўлган. Набирасининг бундай ҳолга тушишига боғчадаги тариячиларнинг болаларга эътиборсизлиги сабаб содир бўлган.
– Неварам билан бўлаётган ҳолат биринчи марта эмас. Авваллари ҳам 4–5 маротаба боғчадан турли жойлари кўкариб келган. Аввалига ўзи ўйнаётганда бехосдан йиқилгандир деб индамай келардик. Аммо кейинчалик билсак, тарбиячиси болаларга қараш ўрнига кимлар биландир гаплашиб ўтирар экан. Натижада ўз ҳолига ташлаб қўйилган болалар эса бир-бирлари билан уришиб, жанжал қилишаркан. Бу ҳолатга эса тарбиячи эътибор қаратмайди, — дейди Насиба Юсупова. – Неварам калтакланган куни ҳам худди шу ҳолат бўлган. Қайсидир бола унинг юзи ва кўзига урган, яна бири қайчи билан сочини қирқиб ташлаган. Худо кўрсатмасин, қайчини бирор ерига тиқиб олганда нима бўларди?!
Насиба Юсупова 25 июлда кун давомида неварасини шифокорларга олиб бориб, унинг ҳолати бўйича хулоса беришни сўраган. Бироқ шифокорлар набирасини кўриб қўйишини, аммо низоли вазият бўлганлиги учун хулоса ёзиб бера олмаслигини билдирган.
Суҳбат жараёнида мурожаатчи 105-сонли мактабгача таълим муассасасида ҳар ойлик тўловдан ташқари 15 минг сўмдан қўшимча тўлов амалга оширилишини билдириб ўтди. Насиба Юсупованинг таъкидлашича, тарбиячи Умида Тагиева ушбу пулнинг 5 минг сўмини олиб қолиб, қолган 10 минг сўмини мудирага бераркан. Тарбиячи боғчага ҳожатхона қуриш учун 100 минг сўмдан пул йиғилаётганлиги, ҳозирда 8 киши пул берганлигини ҳам айтиб ўтган.
– Мен 100 минг сўм пулни бериш имкониятим йўқлигини билдирдим. Нима асосда 100 минг сўмдан йиғилаётганлигининг сабабини сўраганимда, тарбиячи мажбурий эмаслигини айтиб, пулни бўлиб-бўлиб берсангизам бўлади деб айтди, — дейди Насиба Юсупова. – Июль ойи учун 225 минг сўм пул тўладик. Нақд пул қилиб берса осон бўлишини айтди. Шу сабабли ҳам пластикдаги пулни нақд қилиб тўладик.
Воқеа содир бўлганидан сўнг муассаса ходимлари Алишер Ҳамидовнинг уйига бориб ҳеч қаерга мурожаат этмаса, 6 ойлик пулини тўлаб беришини билдирган. Бироқ Насиба Юсупова ҳеч қандай тўлов керакмаслигини, невараси боғчадан бир эмас, бир неча бор лат еган ҳолатда келаётганлиги учун ўз ходимларининг ишига масъулиятсиз бўлган муассаса раҳбари ва болалар тарбиясига масъулиятсиз бўлган тарбиячиларга қонуний чора кўриш лозимлигини айтиб ўтган.
Ҳолат юзасидан Самарқанд вилоят Мактабгача таълим бошқармасига мурожаат қилдик. Мурожаат асосида бошқарма томонидан ишчи гуруҳ ташкил қилинди ва вазиятни ишчи гуруҳи билан биргаликда ўргандик.
Алишер Ҳамидовнинг боғчада калтакланиши ва сочининг қирқилиш сабабларини унинг тарбиячиси Умида Тагиева қуйидагича изоҳлади.
– Соат тахминан 10:45 атрофларида мен болаларни бассейнга чўмилишга олиб бораётган эдим. 7 нафар боланинг ота-онаси фарзандини бассейнда чўмилтирмасликни илтимос қилгани учун уларни расм чизиб ўтиринглар деб хонага қўйиб, чиқиб кетдим. Воқеа шу вақт оралиғида бўлган, — дейди Умида Тагиева.
«Бу вақтда ёрдамчи тарбиячи нима қилаётган эди», деб сўраганимизда, Умида Тагиева ёрдамчи тарбиячини овқат олиб келиши учун кетганлигини билдириб ўтди. Бироқ суҳбат жараёнида маълум бўлишича, муассасада тушлик соат 12:00 да бериларкан. Ёрдамчи тарбиячининг тушлик олиб келиши учун бир соат аввал чиқиб кетиши, тарбиячи эса 7 нафар болага расм чизинглар деб ташлаб, уларни ўз ҳолига ташлаб қўйиши муассасада тарбиячилар ўз вазифасига масъулиятсизлик билан ёндашаётганидан далолат эмасми?
Суриштирув жараёнида Умида Тагиева 5 минг сўмдан фонд учун пул йиғилишини, бироқ бу фонд қайси низом ёки буйруқ асосида тузилганлигини айтиб беролмади. Шунингдек, янги ҳожатхона қуриш учун 100 минг сўмдан йиғилаётган пул ота-оналар кенгаши қарори асосида йиғилаётганлигини билдирди.
– Идиш-товоқларни ювиш, хоналарни тозалаш учун зарур бўлган воситаларни олиш учун 5 минг сўмдан пул йиғамиз. 8 кишидан янги ҳожатхона қуриш учун 100 минг сўмдан пул олганман, — дейди Умида Тагиева.
Юқоридаги ҳолатлар ва мурожаатчи айтган важлар бўйича муассаса мудираси Дилфуза Раҳимова билан ҳам суҳбатлашдик. У кишининг таъкидлашича, боғчада ҳеч қандай фонд йўқ. Қолаверса, тарбиячилар йиғаётган 5 минг сўмдан ҳам хабари йўқ экан. Янги ҳожатхона қуриш учун йиғилаётган пуллар ота-оналар кенгаши йиғилиши асосида бўлаётганлигини билдириб ўтди.
Яна бир қизиқ ҳолат. Воқеа содир бўлган куни Насиба Юсуповага муассаса мудираси Дилфуза Раҳимова қўнғироқ қилиб, болани овқат пулидан озод қилишни, даволаниш учун барча харажатларни ўз ҳисобидан амалга оширишини билдирган. Шунингдек, ушбу воқеани оммавий ахборот воситаларига, хусусан, журналистларга айтмаслигини билдириб, журналистлар муаммони ҳал қила олмаслигини билдирган.
Ростдан ҳам журналист муаммони ҳал қилмайди. Муаммони кўтариб чиқади, холос. Журналист кўтарган муаммога мутасадди ташкилотлар эътибор қарацагина ўша муаммо бартараф этилади. Воқеани ўрганиш жараёнида 26 июль куни Самарқанд вилоятига Мактабгача таълим вазирининг биринчи ўринбосари ташриф буюраётганлигини маълум қилишди. Ўйлаймизки, вазир ўринбосари 105-мактабгача таълим муассасида содир бўлган ҳолатга алоҳида эътибор қаратади. Зеро, шундагина мудираларнинг назоратсизлиги сабаб аввалгидек бир мурғак қизчанинг ўлими ва айбсиз боланинг бармоғи узилиши каби ҳолатлар бошқа таркрорланмайди.
PS. Комиссия ёки текширувчи келса, тезда тозалаш ишларига ўтиб кетамиз. 105-сонли мактабгача таълим муассасасида Алишер Ҳамидов билан бўлган воқеани ўрганиш жараёнида муассаса ходимларининг ободонлаштириш ишларини олиб бораётганлигига гувоҳ бўлдик. Ишқилиб болага қараш ўрнига тозалик ишларига жалб қилинган ходимлар мажбурий ишлатилмаётган бўлсинда.
Изоҳ (0)